3. Pariññāvāravaṇṇanā

[206-208] Tadanantaraṃ pariññāvārepi chaḷeva kālabhedā, anuloma- paṭilomato dveyeva nayā, puggalavāro okāsavāro puggalokāsavāroti imesu pana tīsu puggalavārova labbhati, na itare dve. Kiṃkāraṇā? sadisa- vissajjanatāya. Yo hi koci puggalo yattha katthaci ṭhāne rūpakkhandhañce parijānāti, vedanākkhandhampi parijānātiyeva. Vedanākkhandhañce parijānāti, rūpakkhandhampi

Rūpakkhandhañce na parijānāti, vedanākkhandhampi na parijānātiyeva. Vedanākkhandhañce na parijānāti, rūpakkhandhampi na parijānātiyeva. Tasmā tesupi "yattha rūpakkhandhaṃ parijānāti tattha vedanākkhandhaṃ parijānātī"ti- ādivasena pucchaṃ katvā āmantātveva vissajjanaṃ kātabbaṃ siyāti sadisavissajjanatāya te idha na labbhantīti veditabbā.

Athavā pariññākiccaṃ nāma puggalasseva hoti, no okāsassa, puggalova parijānituṃ samattho, no okāsoti puggalavāro cettha gahito, na okāsavāro. Tassa pana aggahitattā tadanantaro puggalokāsavāro labbhamānopi na gahito. Yo panesa paccuppanne kāle puggalavāro gahito, tattha rūpakkhandhamūlakāni cattāri, vedanākkhandhamūlakāni tīṇi, saññākkhandhamūlakāni dve, saṅkhārakkhandhamūlakaṃ ekanti heṭṭhā vuttanayeneva anulomanaye aggahitaggahaṇena dasa yamakāni paṭilomanaye dasāti vīsati, tathā sesesupīti ekekasmiṃ kāle vīsati vīsati katvā chasu kālesu vīsayamakasataṃ cattāḷīsāni dve pucchāsatāni asītyādhikāni cattāri atthasatāni ca hontīti idamettha pālivavatthānaṃ.