[๖] เยเกจิ กุสลา ธมฺมา สพฺเพ เต กุสลมูลาติ: ตีเณว กุสลมูลานิ อวเสสา กุสลา ธมฺมา น กุสลมูลา ฯ เย วา ปน กุสลมูลา สพฺเพ เต ธมฺมา กุสลาติ: อามนฺตา ฯ เยเกจิ กุสลา ธมฺมา สพฺเพ เต กุสลมูเลน เอกมูลาติ: อามนฺตา ฯ เย วา ปน กุสลมูเลน เอกมูลา สพฺเพ เต ธมฺมา กุสลาติ: กุสลสมุฏฺฐานํ รูปํ กุสลมูเลน เอกมูลํ น กุสลํ กุสลํ กุสลมูเลน เอกมูลญฺเจว กุสลญฺจ ฯ เยเกจิ กุสลมูเลน เอกมูลา ธมฺมา สพฺเพ เต กุสลมูเลน อญฺญมญฺญมูลาติ: มูลานิ ยานิ เอกโต อุปฺปชฺชนฺติ กุสลมูลานิ เอกมูลานิ เจว อญฺญมญฺญมูลานิ จ อวเสสา กุสลมูลสหชาตา ธมฺมา กุสลมูเลน เอกมูลา น จ อญฺญมญฺญมูลา ฯ เย วา ปน กุสลมูเลน อญฺญมญฺญมูลา สพฺเพ เต ธมฺมา กุสลาติ: อามนฺตา ฯ

[๗] เยเกจิ กุสลา ธมฺมา สพฺเพ เต กุสลมูลมูลาติ: ตีเณว กุสลมูลมูลานิ อวเสสา กุสลา ธมฺมา น กุสลมูลมูลา ฯ เย วา ปน กุสลมูลมูลา สพฺเพ เต ธมฺมา กุสลาติ: อามนฺตา ฯ เยเกจิ กุสลา ธมฺมา สพฺเพ เต กุสลมูเลน เอกมูลมูลาติ: อามนฺตา ฯ เย วา ปน กุสลมูเลน เอกมูลมูลา สพฺเพ เต ธมฺมา กุสลาติ: กุสลสมุฏฺฐานํ รูปํ กุสลมูเลน เอกมูลมูลํ น กุสลํ กุสลํ กุสลมูเลน เอกมูลมูลญฺเจว กุสลญฺจ ฯ เยเกจิ กุสลมูเลน เอกมูลมูลา ธมฺมา สพฺเพ เต กุสลมูเลน อญฺญมญฺญมูลมูลาติ: มูลานิ ยานิ เอกโต อุปฺปชฺชนฺติ กุสลมูลานิ เอกมูลมูลานิ เจว อญฺญมญฺญมูลมูลานิ จ อวเสสา กุสลมูลสหชาตา ธมฺมา กุสลมูเลน เอกมูลมูลา น จ อญฺญมญฺญมูลมูลา ฯ เย วา ปน กุสลมูเลน อญฺญมญฺญมูลมูลา สพฺเพ เต ธมฺมา กุสลาติ: อามนฺตา ฯ

[๘] เยเกจิ กุสลา ธมฺมา สพฺเพ เต กุสลมูลกาติ: อามนฺตา ฯ เย วา ปน กุสลมูลกา สพฺเพ เต ธมฺมา กุสลาติ: กุสลสมุฏฺฐานํ รูปํ กุสลมูลกํ น กุสลํ กุสลํ กุสลมูลกญฺเจว กุสลญฺจ ฯ เยเกจิ กุสลา ธมฺมา สพฺเพ เต กุสลมูเลน เอกมูลกาติ: อามนฺตา ฯ เย วา ปน กุสลมูเลน เอกมูลกา สพฺเพ เต ธมฺมา กุสลาติ: กุสลสมุฏฺฐานํ รูปํ กุสลมูเลน เอกมูลกํ น กุสลํ กุสลํ กุสลมูเลน เอกมูลกญฺเจว กุสลญฺจ ฯ เยเกจิ กุสลมูเลน เอกมูลกา ธมฺมา สพฺเพ เต กุสลมูเลน อญฺญมญฺญมูลกาติ: มูลานิ ยานิ เอกโต อุปฺปชฺชนฺติ กุสลมูลานิ เอกมูลกานิ เจว อญฺญมญฺญมูลกานิ จ อวเสสา กุสลมูลสหชาตา ธมฺมา กุสลมูเลน เอกมูลกา น จ อญฺญมญฺญมูลกา ฯ เย วา ปน กุสลมูเลน อญฺญมญฺญมูลกา สพฺเพ เต ธมฺมา กุสลาติ: อามนฺตา ฯ