[๕๒๙] ยสฺส รูปายตนํ นิรุชฺฌติ ตสฺส มนายตนํ นิรุชฺฌตีติ: สรูปกานํ อจิตฺตกานํ จวนฺตานํ เตสํ รูปายตนํ นิรุชฺฌติ โน จ เตสํ มนายตนํ นิรุชฺฌติ สรูปกานํ สจิตฺตกานํ จวนฺตานํ เตสํ รูปายตนญฺจ นิรุชฺฌติ มนายตนญฺจ นิรุชฺฌติ ฯ ยสฺส วา ปน มนายตนํ นิรุชฺฌติ ตสฺส รูปายตนํ นิรุชฺฌตีติ: อรูปกานํ จวนฺตานํ เตสํ มนายตนํ นิรุชฺฌติ โน จ เตสํ รูปายตนํ นิรุชฺฌติ สรูปกานํ สจิตฺตกานํ จวนฺตานํ เตสํ มนายตนญฺจ นิรุชฺฌติ รูปายตนญฺจ นิรุชฺฌติ ฯ

[๕๓๐] ยสฺส รูปายตนํ นิรุชฺฌติ ตสฺส ธมฺมายตนํ นิรุชฺฌตีติ: อามนฺตา ฯ ยสฺส วา ปน ธมฺมายตนํ นิรุชฺฌติ ตสฺส รูปายตนํ นิรุชฺฌตีติ: อรูปกานํ จวนฺตานํ เตสํ ธมฺมายตนํ นิรุชฺฌติ โน จ เตสํ รูปายตนํ นิรุชฺฌติ สรูปกานํ จวนฺตานํ เตสํ ธมฺมายตนญฺจ นิรุชฺฌติ รูปายตนญฺจ นิรุชฺฌติ ฯ

[๕๓๑] ยสฺส มนายตนํ นิรุชฺฌติ ตสฺส ธมฺมายตนํ นิรุชฺฌตีติ: อามนฺตา ฯ ยสฺส วา ปน ธมฺมายตนํ นิรุชฺฌติ ตสฺส มนายตนํ นิรุชฺฌตีติ: อจิตฺตกานํ จวนฺตานํ เตสํ ธมฺมายตนํ นิรุชฺฌติ โน จ เตสํ มนายตนํ นิรุชฺฌติ สจิตฺตกานํ จวนฺตานํ เตสํ ธมฺมายตนญฺจ นิรุชฺฌติ มนายตนญฺจ นิรุชฺฌติ ฯ

[๕๓๒] ยตฺถ จกฺขายตนํ นิรุชฺฌติ ฯเปฯ (อุปฺปาเทปิ นิโรเธปิ อุปฺปาทนิโรเธปิ ยตฺถกํ สพฺพตฺถ สทิสํ) ฯ