[๑๓๕๐] โย ยโต กามราคานุสเยน จ ปฏิฆานุสเยน จ มานานุสเยน จ นิรนุสโย โส ตโต ทิฏฺฐานุสเยน ฯเปฯ วิจิกิจฺฉานุสเยน นิรนุสโยติ: อามนฺตา ฯ โย วา ปน ยโต วิจิกิจฺฉานุสเยน นิรนุสโย โส ตโต กามราคานุสเยน จ ปฏิฆานุสเยน จ มานานุสเยน จ นิรนุสโยติ: เทฺว ปุคฺคลา ทุกฺขาย เวทนาย เต ตโต วิจิกิจฺฉานุสเยน จ กามราคานุสเยน จ มานานุสเยน จ นิรนุสยา โน จ เต ตโต ปฏิฆานุสเยน นิรนุสยา เตว ปุคฺคลา กามธาตุยา ทฺวีสุ เวทนาสุ เต ตโต วิจิกิจฺฉานุสเยน จ ปฏิฆานุสเยน จ นิรนุสยา โน จ เต ตโต กามราคานุสเยน จ มานานุสเยน จ นิรนุสยา เตว ปุคฺคลา รูปธาตุยา อรูปธาตุยา เต ตโต วิจิกิจฺฉานุสเยน จ กามราคานุสเยน จ ปฏิฆานุสเยน จ นิรนุสยา โน จ เต ตโต มานานุสเยน นิรนุสยา เตว ปุคฺคลา อปริยาปนฺเน เต ตโต วิจิกิจฺฉานุสเยน จ นิรนุสยา กามราคานุสเยน จ ปฏิฆานุสเยน จ มานานุสเยน จ นิรนุสยา อนาคามี กามธาตุยา ทฺวีสุ เวทนาสุ รูปธาตุยา อรูปธาตุยา โส ตโต วิจิกิจฺฉานุสเยน จ กามราคานุสเยน จ ปฏิฆานุสเยน จ นิรนุสโย โน จ โส ตโต มานานุสเยน นิรนุสโย โสว ปุคฺคโล ทุกฺขาย เวทนาย อปริยาปนฺเน โส ตโต วิจิกิจฺฉานุสเยน จ นิรนุสโย กามราคานุสเยน จ ปฏิฆานุสเยน จ มานานุสเยน จ นิรนุสโย อรหา สพฺพตฺถ วิจิกิจฺฉานุสเยน จ นิรนุสโย กามราคานุสเยน จ ปฏิฆานุสเยน จ มานานุสเยน จ นิรนุสโย ฯ โย ยโต กามราคานุสเยน จ ปฏิฆานุสเยน จ มานานุสเยน จ นิรนุสโย โส ตโต ภวราคานุสเยน นิรนุสโยติ: อามนฺตา ฯ โย วา ปน ยโต ภวราคานุสเยน นิรนุสโย โส ตโต กามราคานุสเยน จ ปฏิฆานุสเยน จ มานานุสเยน จ นิรนุสโยติ: ตโย ปุคฺคลา ทุกฺขาย เวทนาย เต ตโต ภวราคานุสเยน จ กามราคานุสเยน จ มานานุสเยน จ นิรนุสยา โน จ เต ตโต ปฏิฆานุสเยน นิรนุสยา เตว ปุคฺคลา กามธาตุยา ทฺวีสุ เวทนาสุ เต ตโต ภวราคานุสเยน จ ปฏิฆานุสเยน จ นิรนุสยา โน จ เต ตโต กามราคานุสเยน จ มานานุสเยน จ นิรนุสยา เตว ปุคฺคลา อปริยาปนฺเน เต ตโต ภวราคานุสเยน จ นิรนุสยา กามราคานุสเยน จ ปฏิฆานุสเยน จ มานานุสเยน จ นิรนุสยา อนาคามี กามธาตุยา ทฺวีสุ เวทนาสุ โส ตโต ภวราคานุสเยน จ กามราคานุสเยน จ ปฏิฆานุสเยน จ นิรนุสโย โน จ โส ตโต มานานุสเยน นิรนุสโย โสว ปุคฺคโล ทุกฺขาย เวทนาย อปริยาปนฺเน โส ตโต ภวราคานุสเยน จ นิรนุสโย กามราคานุสเยน จ ปฏิฆานุสเยน จ มานานุสเยน จ นิรนุสโย อรหา สพฺพตฺถ ภวราคานุสเยน จ นิรนุสโย กามราคานุสเยน จ ปฏิฆานุสเยน จ มานานุสเยน จ นิรนุสโย ฯ โย ยโต กามราคานุสเยน จ ปฏิฆานุสเยน จ มานานุสเยน จ นิรนุสโย โส ตโต อวิชฺชานุสเยน นิรนุสโยติ: อนาคามี ทุกฺขาย เวทนาย โส ตโต กามราคานุสเยน จ ปฏิฆานุสเยน จ มานานุสเยน จ นิรนุสโย โน จ โส ตโต อวิชฺชานุสเยน นิรนุสโย โสว ปุคฺคโล อปริยาปนฺเน โส ตโต กามราคานุสเยน จ ปฏิฆานุสเยน จ มานานุสเยน จ นิรนุสโย อวิชฺชานุสเยน จ นิรนุสโย อรหา สพฺพตฺถ กามราคานุสเยน จ ปฏิฆานุสเยน จ มานานุสเยน จ นิรนุสโย อวิชฺชานุสเยน จ นิรนุสโย ฯ โย วา ปน ยโต อวิชฺชานุสเยน นิรนุสโย โส ตโต กามราคานุสเยน จ ปฏิฆานุสเยน จ มานานุสเยน จ นิรนุสโยติ: อามนฺตา ฯ