[๑๔๕๔] โย ปฏิฆานุสยํ น ปริชานาติ โส มานานุสยํ น ปริชานาตีติ: อคฺคมคฺคสมงฺคี ปฏิฆานุสยํ น ปริชานาติ โน จ มานานุสยํ น ปริชานาติ ทฺวินฺนํ มคฺคสมงฺคีนํ ฐเปตฺวา อวเสสา ปุคฺคลา ปฏิฆานุสยญฺจ น ปริชานนฺติ มานานุสยญฺจ น ปริชานนฺติ ฯ โย วา ปน มานานุสยํ น ปริชานาติ โส ปฏิฆานุสยํ น ปริชานาตีติ: อนาคามิมคฺคสมงฺคี มานานุสยํ น ปริชานาติ โน จ ปฏิฆานุสยํ น ปริชานาติ ทฺวินฺนํ มคฺคสมงฺคีนํ ฐเปตฺวา อวเสสา ปุคฺคลา มานานุสยญฺจ น ปริชานนฺติ ปฏิฆานุสยญฺจ น ปริชานนฺติ ฯ โย ปฏิฆานุสยํ น ปริชานาติ โส ทิฏฺฐานุสยํ ฯเปฯ วิจิกิจฺฉานุสยํ น ปริชานาตีติ: อฏฺฐมโก ปฏิฆานุสยํ น ปริชานาติ โน จ วิจิกิจฺฉานุสยํ น ปริชานาติ อนาคามิมคฺคสมงฺคิญฺจ อฏฺฐมกญฺจ ฐเปตฺวา อวเสสา ปุคฺคลา ปฏิฆานุสยญฺจ น ปริชานนฺติ วิจิกิจฺฉานุสยญฺจ น ปริชานนฺติ ฯ โย วา ปน วิจิกิจฺฉานุสยํ น ปริชานาติ โส ปฏิฆานุสยํ น ปริชานาตีติ: อนาคามิมคฺคสมงฺคี วิจิกิจฺฉานุสยํ น ปริชานาติ โน จ ปฏิฆานุสยํ น ปริชานาติ อนาคามิมคฺคสมงฺคิญฺจ อฏฺฐมกญฺจ ฐเปตฺวา อวเสสา ปุคฺคลา วิจิกิจฺฉานุสยญฺจ น ปริชานนฺติ ปฏิฆานุสยญฺจ น ปริชานนฺติ ฯ โย ปฏิฆานุสยํ น ปริชานาติ โส ภวราคานุสยํ ฯเปฯ อวิชฺชานุสยํ น ปริชานาตีติ: อคฺคมคฺคสมงฺคี ปฏิฆานุสยํ น ปริชานาติ โน จ อวิชฺชานุสยํ น ปริชานาติ ทฺวินฺนํ มคฺคสมงฺคีนํ ฐเปตฺวา อวเสสา ปุคฺคลา ปฏิฆานุสยญฺจ น ปริชานนฺติ อวิชฺชานุสยญฺจ น ปริชานนฺติ ฯ โย วา ปน อวิชฺชานุสยํ น ปริชานาติ โส ปฏิฆานุสยํ น ปริชานาตีติ: อนาคามิมคฺคสมงฺคี อวิชฺชานุสยํ น ปริชานาติ โน จ ปฏิฆานุสยํ น ปริชานาติ ทฺวินฺนํ มคฺคสมงฺคีนํ ฐเปตฺวา อวเสสา ปุคฺคลา อวิชฺชานุสยญฺจ น ปริชานนฺติ ปฏิฆานุสยญฺจ น ปริชานนฺติ ฯ

[๑๔๕๕] โย มานานุสยํ น ปริชานาติ โส ทิฏฺฐานุสยํ ฯเปฯ วิจิกิจฺฉานุสยํ น ปริชานาตีติ: อฏฺฐมโก มานานุสยํ น ปริชานาติ โน จ วิจิกิจฺฉานุสยํ น ปริชานาติ อคฺคมคฺคสมงฺคิญฺจ อฏฺฐมกญฺจ ฐเปตฺวา อวเสสา ปุคฺคลา มานานุสยญฺจ น ปริชานนฺติ วิจิกิจฺฉานุสยญฺจ น ปริชานนฺติ ฯ โย วา ปน วิจิกิจฺฉานุสยํ น ปริชานาติ โส มานานุสยํ น ปริชานาตีติ: อคฺคมคฺคสมงฺคี วิจิกิจฺฉานุสยํ น ปริชานาติ โน จ มานานุสยํ น ปริชานาติ อคฺคมคฺคสมงฺคิญฺจ อฏฺฐมกญฺจ ฐเปตฺวา อวเสสา ปุคฺคลา วิจิกิจฺฉานุสยญฺจ น ปริชานนฺติ มานานุสยญฺจ น ปริชานนฺติ ฯ โย มานานุสยํ น ปริชานาติ โส ภวราคานุสยํ ฯเปฯ อวิชฺชานุสยํ น ปริชานาตีติ: อามนฺตา ฯ โย วา ปน อวิชฺชานุสยํ น ปริชานาติ โส มานานุสยํ น ปริชานาตีติ: อามนฺตา ฯ