[๑๗] เยเกจิ อพฺยากตา ธมฺมา สพฺเพ เต อพฺยากตมูลมูลกาติ: อเหตุกํ อพฺยากตํ น อพฺยากตมูลมูลกํ สเหตุกํ อพฺยากตํ อพฺยากตมูลมูลกํ ฯ เย วา ปน อพฺยากตมูลมูลกา สพฺเพ เต ธมฺมา อพฺยากตาติ: อามนฺตา ฯ เยเกจิ อพฺยากตา ธมฺมา สพฺเพ เต อพฺยากตมูเลน เอกมูลมูลกาติ: อเหตุกํ อพฺยากตํ อพฺยากตมูเลน น เอกมูลมูลกํ สเหตุกํ อพฺยากตํ อพฺยากตมูเลน เอกมูลมูลกํ ฯ เย วา ปน อพฺยากตมูเลน เอกมูลมูลกา สพฺเพ เต ธมฺมา อพฺยากตาติ: อามนฺตา ฯ เยเกจิ อพฺยากตมูเลน เอกมูลมูลกา ธมฺมา สพฺเพ เต อพฺยากตมูเลน อญฺญมญฺญมูลมูลกาติ: มูลานิ ยานิ เอกโต อุปฺปชฺชนฺติ อพฺยากตมูลานิ เอกมูลมูลกานิ เจว อญฺญมญฺญมูลมูลกานิ จ อวเสสา อพฺยากตมูลสหชาตา ธมฺมา อพฺยากตมูเลน เอกมูลมูลกา น จ อญฺญมญฺญมูลมูลกา ฯ เย วา ปน อพฺยากตมูเลน อญฺญมญฺญมูลมูลกา สพฺเพ เต ธมฺมา อพฺยากตาติ: อามนฺตา ฯ ___________

[๑๘] เยเกจิ นามา ธมฺมา สพฺเพ เต นามมูลาติ: นเวว นามมูลานิ อวเสสา นามา ธมฺมา น นามมูลา ฯ เย วา ปน นามมูลา สพฺเพ เต ธมฺมา นามาติ: อามนฺตา ฯ เยเกจิ นามา ธมฺมา สพฺเพ เต นามมูเลน เอกมูลาติ: อเหตุกํ นามํ นามมูเลน น เอกมูลํ สเหตุกํ นามํ นามมูเลน เอกมูลํ ฯ เย วา ปน นามมูเลน เอกมูลา สพฺเพ เต ธมฺมา นามาติ: นามสมุฏฺฐานํ รูปํ นามมูเลน เอกมูลํ น นามํ นามํ นามมูเลน เอกมูลญฺเจว นามญฺจ ฯ เยเกจิ นามมูเลน เอกมูลา ธมฺมา สพฺเพ เต นามมูเลน อญฺญมญฺญมูลาติ: มูลานิ ยานิ เอกโต อุปฺปชฺชนฺติ นามมูลานิ เอกมูลานิ เจว อญฺญมญฺญมูลานิ จ อวเสสา นามมูลสหชาตา ธมฺมา นามมูเลน เอกมูลา น จ อญฺญมญฺญมูลา ฯ เย วา ปน นามมูเลน อญฺญมญฺญมูลา สพฺเพ เต ธมฺมา นามาติ: อามนฺตา ฯ

[๑๙] เยเกจิ นามา ธมฺมา สพฺเพ เต นามมูลมูลาติ: นเวว นามมูลมูลานิ อวเสสา นามา ธมฺมา น นามมูลมูลา ฯ เย วา ปน นามมูลมูลา สพฺเพ เต ธมฺมา นามาติ: อามนฺตา ฯ เยเกจิ นามา ธมฺมา สพฺเพ เต นามมูเลน เอกมูลมูลาติ: อเหตุกํ นามํ นามมูเลน น เอกมูลมูลํ สเหตุกํ นามํ นามมูเลน เอกมูลมูลํ ฯ เย วา ปน นามมูเลน เอกมูลมูลา สพฺเพ เต ธมฺมา นามาติ: นามสมุฏฺฐานํ รูปํ นามมูเลน เอกมูลมูลํ น นามํ นามํ นามมูเลน เอกมูลมูลญฺเจว นามญฺจ ฯ เยเกจิ นามมูเลน เอกมูลมูลา ธมฺมา สพฺเพ เต นามมูเลน อญฺญมญฺญมูลมูลาติ: มูลานิ ยานิ เอกโต อุปฺปชฺชนฺติ นามมูลานิ เอกมูลมูลานิ เจว อญฺญมญฺญมูลมูลานิ จ อวเสสา นามมูลสหชาตา ธมฺมา นามมูเลน เอกมูลมูลา น จ อญฺญมญฺญมูลมูลา ฯ เย วา ปน นามมูเลน อญฺญมญฺญมูลมูลา สพฺเพ เต ธมฺมา นามาติ: อามนฺตา ฯ