[๓๑๒] ยตฺถ ฆานายตนํ อุปฺปชฺชติ ตตฺถ รูปายตนํ อุปฺปชฺชตีติ: อามนฺตา ฯ ยตฺถ วา ปน รูปายตนํ อุปฺปชฺชติ ตตฺถ ฆานายตนํ อุปฺปชฺชตีติ: รูปาวจเร ตตฺถ รูปายตนํ อุปฺปชฺชติ โน จ ตตฺถ ฆานายตนํ อุปฺปชฺชติ กามาวจเร ตตฺถ รูปายตนญฺจ อุปฺปชฺชติ ฆานายตนญฺจ อุปฺปชฺชติ ฯ (ยตฺถ ฆานายตนํ อุปฺปชฺชติ ตตฺถ มนายตนญฺจ ธมฺมายตนญฺจ เอกสทิสํ นามํ นตฺถิ อุปริวาเร สงฺเขโป โหตีติ ชานิตพฺพํ) ฯ

[๓๑๓] ยตฺถ ฆานายตนํ อุปฺปชฺชติ ตตฺถ ธมฺมายตนํ อุปฺปชฺชตีติ: อามนฺตา ฯ ยตฺถ วา ปน ธมฺมายตนํ อุปฺปชฺชติ ตตฺถ ฆานายตนํ อุปฺปชฺชตีติ: รูปาวจเร อรูปาวจเร ตตฺถ ธมฺมายตนํ อุปฺปชฺชติ โน จ ตตฺถ ฆานายตนํ อุปฺปชฺชติ กามาวจเร ตตฺถ ธมฺมายตนญฺจ อุปฺปชฺชติ ฆานายตนญฺจ อุปฺปชฺชติ ฯ

[๓๑๔] ยตฺถ รูปายตนํ อุปฺปชฺชติ ตตฺถ มนายตนํ อุปฺปชฺชตีติ: อสญฺญสตฺเต ตตฺถ รูปายตนํ อุปฺปชฺชติ โน จ ตตฺถ มนายตนํ อุปฺปชฺชติ ปญฺจโวกาเร ตตฺถ รูปายตนญฺจ อุปฺปชฺชติ มนายตนญฺจ อุปฺปชฺชติ ฯ ยตฺถ วา ปน มนายตนํ อุปฺปชฺชติ ตตฺถ รูปายตนํ อุปฺปชฺชตีติ: อรูเป ตตฺถ มนายตนํ อุปฺปชฺชติ โน จ ตตฺถ รูปายตนํ อุปฺปชฺชติ ปญฺจโวกาเร ตตฺถ มนายตนญฺจ อุปฺปชฺชติ รูปายตนญฺจ อุปฺปชฺชติ ฯ

[๓๑๕] ยตฺถ รูปายตนํ อุปฺปชฺชติ ตตฺถ ธมฺมายตนํ อุปฺปชฺชตีติ: อามนฺตา ฯ ยตฺถ วา ปน ธมฺมายตนํ อุปฺปชฺชติ ตตฺถ รูปายตนํ อุปฺปชฺชตีติ: อรูเป ตตฺถ ธมฺมายตนํ อุปฺปชฺชติ โน จ ตตฺถ รูปายตนํ อุปฺปชฺชติ ปญฺจโวกาเร อสญฺญสตฺเต ตตฺถ ธมฺมายตนญฺจ อุปฺปชฺชติ รูปายตนญฺจ อุปฺปชฺชติ ฯ