[๑๓๖๕] โย จกฺขุนฺทฺริยํ น ปริชานิตฺถ โส โทมนสฺสินฺทฺริยํ นปฺปชหิตฺถาติ: เทฺว ปุคฺคลา จกฺขุนฺทฺริยํ น ปริชานิตฺถ โน จ โทมนสฺสินฺทฺริยํ นปฺปชหิตฺถ ฉ ปุคฺคลา จกฺขุนฺทฺริยญฺจ น ปริชานิตฺถ โทมนสฺสินฺทฺริยญฺจ นปฺปชหิตฺถ ฯ โย วา ปน โทมนสฺสินฺทฺริยํ นปฺปชหิตฺถ โส จกฺขุนฺทฺริยํ น ปริชานิตฺถาติ: อามนฺตา ฯ

[๑๓๖๖] โย จกฺขุนฺทฺริยํ น ปริชานิตฺถ โส อนญฺญาตญฺญสฺสามีตินฺทฺริยํ น ภาวิตฺถาติ: ฉ ปุคฺคลา จกฺขุนฺทฺริยํ น ปริชานิตฺถ โน จ อนญฺญาตญฺญสฺสามีตินฺทฺริยํ น ภาวิตฺถ เทฺว ปุคฺคลา จกฺขุนฺทฺริยญฺจ น ปริชานิตฺถ อนญฺญาตญฺญสฺสามีตินฺทฺริยญฺจ น ภาวิตฺถ ฯ โย วา ปน อนญฺญาตญฺญสฺสามีตินฺทฺริยํ น ภาวิตฺถ โส จกฺขุนฺทฺริยํ น ปริชานิตฺถาติ: อามนฺตา ฯ

[๑๓๖๗] โย จกฺขุนฺทฺริยํ น ปริชานิตฺถ โส อญฺญินฺทฺริยํ น ภาวิตฺถาติ: อามนฺตา ฯ โย วา ปน อญฺญินฺทฺริยํ น ภาวิตฺถ โส จกฺขุนฺทฺริยํ น ปริชานิตฺถาติ: อามนฺตา ฯ

[๑๓๖๘] โย จกฺขุนฺทฺริยํ น ปริชานิตฺถ โส อญฺญาตาวินฺทฺริยํ น สจฺฉิกริตฺถาติ: อามนฺตา ฯ โย วา ปน อญฺญาตาวินฺทฺริยํ น สจฺฉิกริตฺถ โส จกฺขุนฺทฺริยํ น ปริชานิตฺถาติ: โย อคฺคผลํ สจฺฉิกโรติ โส อญฺญาตาวินฺทฺริยํ น สจฺฉิกริตฺถ โน จ จกฺขุนฺทฺริยํ น ปริชานิตฺถ อฏฺฐ ปุคฺคลา อญฺญาตาวินฺทฺริยญฺจ น สจฺฉิกริตฺถ จกฺขุนฺทฺริยญฺจ น ปริชานิตฺถ ฯ