[๓๙๒] อนญฺญาตญฺญสฺสามีติ อนญฺญาตญฺญสฺสามีตินฺทฺริยนฺติ: อามนฺตา ฯ อนญฺญาตญฺญสฺสามีตินฺทฺริยํ อนญฺญาตญฺญสฺสามีตีติ: อามนฺตา ฯ อญฺญํ อญฺญินฺทฺริยนฺติ: อามนฺตา ฯ อญฺญินฺทฺริยํ อญฺญนฺติ: อามนฺตา ฯ อญฺญาตาวี อญฺญาตาวินฺทฺริยนฺติ: อามนฺตา ฯ อญฺญาตาวินฺทฺริยํ อญฺญาตาวีติ: อามนฺตา ฯ

[๓๙๓] น จกฺขุ น จกฺขุนฺทฺริยนฺติ: อามนฺตา ฯ น จกฺขุนฺทฺริยํ น จกฺขูติ: ทิพฺพจกฺขุ ปญฺญาจกฺขุ น จกฺขุนฺทฺริยํ จกฺขุ จกฺขุญฺจ จกฺขุนฺทฺริยญฺจ ฐเปตฺวา อวเสสา น เจว จกฺขุ น จ จกฺขุนฺทฺริยํ ฯ น โสตํ น โสตินฺทฺริยนฺติ: อามนฺตา ฯ น โสตินฺทฺริยํ น โสตนฺติ: ทิพฺพโสตํ ตณฺหาโสตํ น โสตินฺทฺริยํ โสตํ โสตญฺจ โสตินฺทฺริยญฺจ ฐเปตฺวา อวเสสา น เจว โสตํ น จ โสตินฺทฺริยํ ฯ น ฆานํ น ฆานินฺทฺริยนฺติ: อามนฺตา ฯ น ฆานินฺทฺริยํ น ฆานนฺติ: อามนฺตา ฯ น ชิวฺหา น ชิวฺหินฺทฺริยนฺติ: อามนฺตา ฯ น ชิวฺหินฺทฺริยํ น ชิวฺหาติ: อามนฺตา ฯ น กาโย น กายินฺทฺริยนฺติ: อามนฺตา ฯ น กายินฺทฺริยํ น กาโยติ: กายินฺทฺริยํ ฐเปตฺวา อวเสสา น กายินฺทฺริยํ กาโย กายญฺจ กายินฺทฺริยญฺจ ฐเปตฺวา อวเสสา น เจว กาโย น จ กายินฺทฺริยํ ฯ น มโน น มนินฺทฺริยนฺติ: อามนฺตา ฯ น มนินฺทฺริยํ น มโนติ: อามนฺตา ฯ

[๓๙๔] น อิตฺถี น อิตฺถินฺทฺริยนฺติ: อิตฺถินฺทฺริยํ น อิตฺถี อิตฺถินฺทฺริยํ อิตฺถิญฺจ อิตฺถินฺทฺริยญฺจ ฐเปตฺวา อวเสสา น เจว อิตฺถี น จ อิตฺถินฺทฺริยํ ฯ น อิตฺถินฺทฺริยํ น อิตฺถีติ: อิตฺถี น อิตฺถินฺทฺริยํ อิตฺถี อิตฺถิญฺจ อิตฺถินฺทฺริยญฺจ ฐเปตฺวา อวเสสา น เจว อิตฺถี น จ อิตฺถินฺทฺริยํ ฯ น ปุริโส น ปุริสินฺทฺริยนฺติ; ปุริสินฺทฺริยํ น ปุริโส ปุริสินฺทฺริยํ ปุริสญฺจ ปุริสินฺทฺริยญฺจ ฐเปตฺวา อวเสสา น เจว ปุริโส น จ ปุริสินฺทฺริยํ ฯ น ปุริสินฺทฺริยํ น ปุริโสติ: ปุริโส น ปุริสินฺทฺริยํ ปุริโส ปุริสญฺจ ปุริสินฺทฺริยญฺจ ฐเปตฺวา อวเสสา น เจว ปุริโส น จ ปุริสินฺทฺริยํ ฯ น ชีวิตํ น ชีวิตินฺทฺริยนฺติ: อามนฺตา ฯ น ชีวิตินฺทฺริยํ น ชีวิตนฺติ: อามนฺตา ฯ