[๑๓๘๓] โย อนญฺญาตญฺญสฺสามีตินฺทฺริยํ ภาเวสฺสติ โส อญฺญาตาวินฺทฺริยํ สจฺฉิกริสฺสตีติ: อามนฺตา ฯ โย วา ปน อญฺญาตาวินฺทฺริยํ สจฺฉิกริสฺสติ โส อนญฺญาตญฺญสฺสามีตินฺทฺริยํ ภาเวสฺสตีติ: สตฺต ปุคฺคลา อญฺญาตาวินฺทฺริยํ สจฺฉิกริสฺสนฺติ โน จ อนญฺญาตญฺญสฺสามีตินฺทฺริยํ ภาเวสฺสนฺติ เย ปุถุชฺชนา มคฺคํ ปฏิลภิสฺสนฺติ เต อญฺญาตาวินฺทฺริยญฺจ สจฺฉิกริสฺสนฺติ อนญฺญาตญฺญสฺสามีตินฺทฺริยญฺจ ภาเวสฺสนฺติ ฯ

[๑๓๘๔] โย อญฺญินฺทฺริยํ ภาเวสฺสติ โส อญฺญาตาวินฺทฺริยํ สจฺฉิกริสฺสตีติ: อามนฺตา ฯ โย วา ปน อญฺญาตาวินฺทฺริยํ สจฺฉิกริสฺสติ โส อญฺญินฺทฺริยํ ภาเวสฺสตีติ: อคฺคมคฺคสมงฺคี อญฺญาตาวินฺทฺริยํ สจฺฉิกริสฺสติ โน จ อญฺญินฺทฺริยํ ภาเวสฺสติ สตฺต ปุคฺคลา อญฺญาตาวินฺทฺริยญฺจ สจฺฉิกริสฺสนฺติ อญฺญินฺทฺริยญฺจ ภาเวสฺสนฺติ ฯ