อสีติญฺจ สกสฺสานิ ปุจฺฉา ทุกสเต วิทู.

อยํ ตาว สุทฺธิเก ติกปฏฺฐาเน จ ทุกปฏฺฐาเน จ ปุจฺฉานํ คณนปริจฺเฉโท.

ยํ ปน ตโต ปรํ พาวีสติติเก คเหตฺวา ทุกสเต ปกฺขิปิตฺวา ทุกติกปฏฺฐานํ นาม เทสิตํ, ตตฺถาปิ "สิยา เหตุํ กุสลํ ธมฺมํ ปฏิจฺจ เหตุ กุสโล ธมฺโม อุปฺปชฺเชยฺย เหตุปจฺจยา"ติ เอวํ พาวีสติยา ติเกสุ เอเกกํ ติกํ ทุกานํ สเตน สเตน สทฺธึ โยเชตฺวา ทสฺเสตพฺพานํ ปุจฺฉานํ เหฏฺฐา วุตฺตนเยน สพฺเพสํ เอกมูลกาทีนํ วเสน คเณตฺวา ๒- ปริจฺเฉโท เวทิตพฺโพ.

ยมฺปิ ตโต ปรํ ทุกสตํ คเหตฺวา พาวีสติยา ติเกสุ ปกฺขิปิตฺวา ติกทุกปฏฺฐานํ นาม เทสิตํ, ตตฺถาปิ "สิยา กุสลํ เหตุํ ธมฺมํ ปฏิจฺจ กุสโล เหตุธมฺโม อุปฺปชฺเชยฺย เหตุปจฺจยา"ติ เอวํ ทุกสเต เอเกกํ ทุกํ พาวีสติยา ติเกหิ สทฺธึ โยเชตฺวา ทสฺเสตพฺพานํ ปุจฺฉานํ เหฏฺฐา วุตฺตนเยน สพฺเพสํ เอกมูลกาทีนํ วเสน คเณตฺวา ๒- ปริจฺเฉโท เวทิตพฺโพ.