[๓๕๑-๓๕๔] ปจฺจนีเย ปน กุสลํ น ลพฺภตีติ อกุสลเมว อาทึ กตฺวา วิสฺสชฺชนํ กตํ, ตํ อุตฺตานตฺถเมว.

[๓๕๙] ยมฺปเนตํ ๓- ปจฺจนีเย วิสฺสชฺชนปริจฺเฉทํ คณนาโต ทสฺเสตุํ นเหตุยา เทฺวติอาทิ วุตฺตํ, ตตฺถ เทฺว ตีณิ เอกนฺติ ตโย ปริจฺเฉทา, เตสํ วเสน ทุกติกาทีสุ ปจฺจยสํสนฺทเน คณนา เวทิตพฺพา. อิธาปิ อธิกตรคณนานํ อูนตรคณเนน สทฺธึ สํสนฺทเน อูนตรคณนเมว ลพฺภติ, สมคณเนน สทฺธึ สมคณนํ.

[๓๖๐-๓๖๘] นเหตุปจฺจยา นาธิปติยา เทฺวติ นเหตุยา ลทฺธํ ทฺวยเมว. เสสทฺวเยสุปิ เอเสว นโย. นกมฺเม เอกนฺติ อเหตุกกิริยาเจตนํ ปจฺจยุปฺปนฺนํ กตฺวา อพฺยากเตน อพฺยากตํ. นวิปาเก เทฺวติ อเหตุกโมหกิริยาวเสน เทฺว. นฌาเน เอกนฺติ อเหตุกปญฺจวิญฺญาณวเสน อพฺยากตวิสฺสชฺชนํ เวทิตพฺพํ. นมคฺเค เอกนฺติ อเหตุกวิปากกิริยาวเสน อพฺยากตวิสฺสชฺชนํ. อิมินา อุปาเยน สพฺพสํสนฺทเนสุ อตฺโถ เวทิตพฺโพติ.