เอเตสุ ปน ฆฏเนสุ สพฺพปฐมานิ จตฺตาริ ฆฏนานิ สามญฺญโต นวนฺนมฺปิ เหตูนํ วเสน วุตฺตานิ อวิปากาเนว. ๑- อพฺยากเตนาพฺยากตวิสฺสชฺชเน ปเนตฺถ วิปากเหตุปิ ลภติ.

ตโต ปรานิ ปญฺจ ฆฏนานิ วิปากเหตุวเสน วุตฺตานิ. ตตฺถ สพฺเพ สหชาตวิปากา เจว วิปากสหชาตรูปา จ. เตสุ ปฐมฆฏเน วิปากา เจว ตํสมุฏฺฐานรูปา จ ลพฺภนฺติ, ทุติเย วิปากา เจว ปฏิสนฺธิยญฺจ วตฺถุรูปํ. ตติเย อรูปธมฺมาว. จตุตฺเถ วิปากจิตฺตสมุฏฺฐานรูปเมว. ปญฺจเม วตฺถุรูปเมว ลพฺภติ.

ตโต ปรานิ ปญฺจทส ฆฏนานิ อินฺทฺริยยุตฺตานิ ๒- อโมหเหตุวเสน วุตฺตานิ. ตตฺถ ปฐมานิ นว นิราธิปตีนิ, ปจฺฉิมานิ ฉ สาธิปตีนิ. นิราธิปติเกสุปิ ปฐมานิ จตฺตาริ สามญฺญโต สพฺพตฺถ อโมหวเสน วุตฺตานิ, ปจฺฉิมานิ ปญฺจ วิปากาโมหวเสน. ตตฺถ นิราธิปติเกสุ ปฐเม จตฺตารีติ เหฏฺฐา เหตาธิปติทุเก ทสฺสิตาเนว. ทุติเย จิตฺตสมุฏฺฐานรูปํ ปริหายติ. ตติเย วตฺถุรูปํ ปริหายติ. จตุตฺเถ กุสโล ธมฺโม จิตฺตสมุฏฺฐานานํ, อพฺยากโต ตํสมุฏฺฐานรูปเมว ๓- ลพฺภติ. ตโต ปรานิ วิปากยุตฺตานิ ปญฺจ เหฏฺฐา วุตฺตนยาเนว. สาธิปติเกสุ ปฐมานิ ตีณิ ฆฏนานิ สามญฺญโต วิปากาวิปากเหตุวเสน วุตฺตานิ. เตสุ ปฐเม จตฺตาริ วุตฺตนยาเนว. ทุติเย รูปํ ปริหายติ, ตติเย อรูปํ ปริหายติ. ตโต ปรานิ ตีณิ วิปากเหตุวเสน วุตฺตานิ. เตสุ ปฐเม รูปารูปํ ลพฺภติ, ทุติเย อรูปเมว, ตติเย รูปเมวาติ. เอวมฺปิ