ตตฺถ เอกมูเลกาวสานา ๑- นว, เอกมูลทุกาวสานา นว, เอกมูลติกาวสานา ติสฺโส, ทุกมูเลกาวสานา นว, ทุกมูลทุกาวสานา นว, ทุกมูลติกาวสานา ติสฺโส, ติกมูเลกาวสานา ติสฺโส, ติกมูลทุกาวสานา ติสฺโส, ติกมูลติกาวสานา เอกาติ เอวเมตา มูลาวสานวเสนาปิ เวทิตพฺพา. ยถา จ เหตุปจฺจเย เอกูนปญฺญาสํ, อารมฺมณปจฺจยาทีสุปิ ตเถวาติ สพฺเพสุปิ จตุวีสติยา ปจฺจเย:-

สหสฺสเมกญฺจ สตํ ฉสตฺตติ ปุนาปรา

ปุจฺฉา สมฺปิณฺฑิตา โหนฺติ นยมฺหิ เอกมูลเก.

[๓๕-๓๖] ตโต ปรํ เหตุปจฺจยา อารมฺมณปจฺจยาติ ทุมูลกนโย อารทฺโธ. ตตฺถ เหตารมฺมณทุโก ฯเปฯ เหตาวิคตทุโกติ เหตุปจฺจเยน สทฺธึ เตวีสติ ทุกา โหนฺติ. เตสุ เหตุปจฺจเย วิย เหตารมฺมณทุเกปิ เอกูนปญฺญาสํ ปุจฺฉา, ตาสุ ปาลิยํ เทฺวเยว ทสฺสิตา. ยถา จ เหตารมฺมณทุเก เอกูนปญฺญาสํ, ตถา เหตาธิปติทุกาทีสุปิ. ตตฺถ ปฐมปุจฺฉาวเสน เหตาธิปติทุโก เหตานนฺตรทุโก เหตุสมนนฺตรทุโกติ ปฏิปาฏิยา ตโย ทุเก ทสฺเสตฺวา ปริโยสาเน เหตาวิคตทุโก ทสฺสิโต, เสสํ สงฺขิตฺตํ. ปุจฺฉาปริจฺเฉโท ปเนตฺเถวํ เวทิตพฺโพ:-