สหสฺสเมกญฺจ สตํ สตฺตวีสติเมว จ

ทุเกสุ เตวีสติยา ปุจฺฉา โหนฺติ ทุมูลเก.

[๓๗] ตโต ปรํ เหตุปจฺจยา อารมฺมณปจฺจยา อธิปติปจฺจยาติ ติมูลกนโย อารทฺโธ. ตตฺถ เหตารมฺมณทุเกน สทฺธึ อธิปติปจฺจยาทีสุ พาวีสติยา ปจฺจเยสุ เอกเมกสฺส โยชนาวเสน พาวีสติ ติกา โหนฺติ. เตสุ ปฐมปุจฺฉาวเสน ปฐมตฺติกญฺจ ทุติยตฺติกญฺจ ทสฺเสตฺวา ปริโยสาเน ติโก ๑- ทสฺสิโต, เสสํ สงฺขิตฺตํ. ยถา ปน ทุเกสุ, เอวํ ติเกสุปิ เอกเมกสฺมึ ติเก เอกูนปญฺญาสํ กตฺวา สพฺเพสุปิ พาวีสติยา ติเกสุ:-