[88] Nādhipatipaccaye kāmaṃ adhipatipi attanā saddhiṃ dutiyassa adhipatino abhāvā adhipatipaccayaṃ na labhati, yathā pana vicikicchuddhaccasahagato moho ahetuko, na tathā adhipatiyeva nirādhipati. Chandādīsu pana aññataraṃ adhipatiṃ akatvā kusalādīnaṃ uppattikāle sabbepi kusalādayo nirādhipatino. Tasmā mohaṃ viya visuṃ adhipatimattameva anuddharitvā sabbasaṅgāhikavasenevesā "ekaṃ khandhaṃ paṭicca tayo khandhā"tiādikā desanā katāti veditabbā.

[89] Nānantaranasamanantaresu nārammaṇe viya rūpameva paccayuppannaṃ. Tena vuttaṃ "nārammaṇapaccayasadisan"ti. Sahajātapaccayo parihīno. Yathā cesa, tathā nissayaatthiavigatapaccayāpi. Kiṃkāraṇā? etehi vinā kassaci anuppattito. Sahajātanissayaatthiavigatapaccaye hi paccakkhāya ekopi rūpārūpadhammo nuppajjati, tasmā te parihīnā.

[90] Naaññamaññapaccayavibhaṅge paṭisandhikkhaṇe vipākābyākate khandhe paṭicca kaṭattārūpanti hadayavatthuvajjaṃ veditabbaṃ.

[91] Naupanissayapaccayavibhaṅge rūpameva paccayuppannaṃ. Tañhi upanissayapaccayaṃ na labhati. Arūpaṃ pana kiñcāpi ārammaṇūpanissayapakatūpanissaye na labheyya, anantarūpanissayamuttakaṃ pana natthi. Tena vuttaṃ "naārammaṇapaccayasadisan"ti.