[92] Napurejāte cittasamuṭṭhānaṃ rūpanti pañcavokāravasena vuttaṃ.

[93] Napacchājātapaccayāti ettha sahajātapurejātapaccayā saṅgahaṃ gacchanti. Tasmā sahajātapaccayasadisā ettha pāli, sā pana nādhipatipaccaye vitthāritāti idha saṅkhittā. Nāsevanapaccayo kusalākusalapaṭhamajavanavasena veditabbo, tathā kiriyābyākataṃ. Pāli pana idhāpi nādhipatipaccaye vitthāritavaseneva veditabbā. Tenevāha "napacchājātapaccayampi nāsevanapaccayampi nādhipatipaccayasadisan"ti.

[94-97] Nakammapaccaye vipākacetanā nānākkhaṇikakammapaccayaṃ labhatīti na gahitā. Nāhārapaccaye ekaccaṃ rūpameva paccayuppannaṃ, tathā naindriyapaccaye.