6. Sampayuttavāravaṇṇanā

[392-400] Sampayuttavāre kusalaṃ dhammaṃ sampayuttoti kusalaṃ dhammaṃ sampayuttapaccayaṃ katvāti attho. Sesamettha saṃsaṭṭhavāre vuttanayeneva veditabbaṃ. Avasāne panassa "saṃsaṭṭhatthaṃ nāma sampayuttatthaṃ, sampayuttatthaṃ nāma saṃsaṭṭhatthan"ti idaṃ ubhinnampi etesaṃ vārānaṃ atthato ninnānākaraṇabhāvadassanatthaṃ vuttaṃ. Atthato hi etepi paṭicca sahajātā viya paccayanissayā viya ca ninnānākaraṇā. Evaṃ santepi aññamaññassa atthaniyamanatthaṃ vuttā. "saṃsaṭṭhā yojitā hayā"tiādīsu asampayuttampi saṃsaṭṭhanti vuccati. "yā sā vīmaṃsā kosajjasahagatā kosajjasampayuttā"tiādīsu asaṃsaṭṭhaṃ vokiṇṇampi sampayuttanti āgataṃ. Iti saṃsaṭṭhavārena ekuppādādilakkhaṇassa sampayuttassa saṃsaṭṭhabhāvaṃ sampayuttavārena ca saṃsaṭṭhassa ekuppādādilakkhaṇassa sampayuttabhāvaṃ niyāmetuṃ ubhopete vuttā. Apica tathā bujjhanakānaṃ ajjhāsayavasena desanāvilāsena niruttipaṭisambhidāppabhedajānanavasena cāpi ete ubhopi vuttāti veditabbāti.

Sampayuttavāravaṇṇanā niṭṭhitā.