Kāmāvacaratihetukasomanassasahagatakiriyādvayaṃ bhavaṅgavasena pavattānaṃ terasannaṃ tihetukavipākānaṃ tadārammaṇavasena pañcannaṃ somanassasahagatavipākānaṃ parikammavasena pavattānaṃ catunnaṃ rūpāvacarakiriyānaṃ arahattaphalasamāpattiyā vasena catunnaṃ somanassasahagataarahattaphalasamāpattīnaṃ attano pacchimassa cāti aggahitaggahaṇena pañcavīsatiyā duhetukasomanassasahagatakiriyādvayaṃ yathāvuttānaṃ terasannaṃ bhavaṅga- cittānaṃ pañcannaṃ tadārammaṇānaṃ attano pacchimassa cāti aggahitaggahaṇena sattarasannaṃ.

Duhetukaupekkhāsahagata- kiriyādvayaṃ tesaññeva terasannaṃ bhavaṅgānaṃ channaṃ tadārammaṇānaṃ attano pacchimassa cāti aggahitaggahaṇena aṭṭhārasannaṃ. Rūpāvacarakiriyāsu ekekā navannaṃ pañcavokāre tihetukabhavaṅgānaṃ attano pacchimassa cāti dasannaṃ. Arūpāvacarakiriyāsu paṭhamā pañcavokāre navannaṃ bhavaṅgānaṃ catuvokāre ekassa attano pacchimassa cāti ekādasannaṃ. Dutiyā catuvokāre dve bhavaṅgāni labhati. Tatiyā tīṇi, catutthā cattāri phalasamāpattiñcāti tāsu ekekā yathāpaṭipāṭiyā ekādasannaṃ dvādasannaṃ terasannaṃ pañcadasannañca anantarapaccayo hoti. Evaṃ bahuvidhenāpi niddesaṃ labhati. Tena vuttaṃ:-

"dasadhā sattarasadhā samasaṭṭhividhena ca

bahudhāpi ca niddesaṃ sādhukaṃ upalakkhaye"ti.