[๑๔๐] อวิตกฺกอวิจาโร ธมฺโม อวิตกฺกวิจารมตฺตสฺส จ อวิตกฺกอวิจารสฺส จ ธมฺมสฺส อารมฺมณปจฺจเยน ปจฺจโย นิพฺพานํ อวิตกฺกวิจารมตฺตสฺส มคฺคสฺส ผลสฺส วิจารสฺส จ อารมฺมณปจฺจเยน ปจฺจโย ฯ

[๑๔๑] อวิตกฺกอวิจาโร ธมฺโม สวิตกฺกสวิจารสฺส จ อวิตกฺกวิจารมตฺตสฺส จ ธมฺมสฺส อารมฺมณปจฺจเยน ปจฺจโย อริยา อวิตกฺกอวิจารา ฌานา ... มคฺคา ... ผลา วุฏฺฐหิตฺวา ผลํ ปจฺจเวกฺขนฺติ ตํ อารพฺภ สวิตกฺกสวิจารา ขนฺธา จ วิตกฺโก จ อุปฺปชฺชนฺติ อริยา นิพฺพานํ ปจฺจเวกฺขนฺติ นิพฺพานํ โคตฺรภุสฺส โวทานสฺส วิตกฺกสฺส จ สวิตกฺกสวิจารสฺส มคฺคสฺส วิตกฺกสฺส จ สวิตกฺกสวิจารสฺส ผลสฺส วิตกฺกสฺส จ อาวชฺชนาย วิตกฺกสฺส จ อารมฺมณปจฺจเยน ปจฺจโย จกฺขุํ อนิจฺจโต ทุกฺขโต อนตฺตโต วิปสฺสติ ตํ อารพฺภ สวิตกฺกสวิจารา ขนฺธา จ วิตกฺโก จ อุปฺปชฺชนฺติ โสตํ ... ฯเปฯ โผฏฺฐพฺพํ วตฺถุํ ... อวิตกฺกอวิจาเร ขนฺเธ จ วิจารญฺจ อนิจฺจโต ทุกฺขโต อนตฺตโต วิปสฺสติ ตํ อารพฺภ สวิตกฺกสวิจารา ขนฺธา จ วิตกฺโก จ อุปฺปชฺชนฺติ ฯ

[๑๔๒] อวิตกฺกวิจารมตฺโต จ อวิตกฺกอวิจาโร จ ธมฺมา สวิตกฺกสวิจารสฺส ธมฺมสฺส อารมฺมณปจฺจเยน ปจฺจโย อวิตกฺกวิจารมตฺเต ขนฺเธ จ วิจารญฺจ อารพฺภ สวิตกฺกสวิจารา ขนฺธา อุปฺปชฺชนฺติ ฯ

[๑๔๓] อวิตกฺกวิจารมตฺโต จ อวิตกฺกอวิจาโร จ ธมฺมา อวิตกฺกวิจารมตฺตสฺส ธมฺมสฺส อารมฺมณปจฺจเยน ปจฺจโย อวิตกฺกวิจารมตฺเต ขนฺเธ จ วิจารญฺจ อารพฺภ วิตกฺโก อุปฺปชฺชติ ฯ