[๑๙๒] อวิตกฺกวิจารมตฺโต จ อวิตกฺกอวิจาโร จ ธมฺมา สวิตกฺกสวิจารสฺส จ อวิตกฺกวิจารมตฺตสฺส จ ธมฺมสฺส อนนฺตรปจฺจเยน ปจฺจโย อวิตกฺกวิจารมตฺตํ จุติจิตฺตญฺจ วิจาโร จ สวิตกฺกสวิจารสฺส อุปปตฺติจิตฺตสฺส วิตกฺกสฺส จ อนนฺตรปจฺจเยน ปจฺจโย อวิตกฺกวิจารมตฺตํ ภวงฺคญฺจ วิจาโร จ อาวชฺชนาย วิตกฺกสฺส จ อนนฺตรปจฺจเยน ปจฺจโย อวิตกฺกวิจารมตฺตา ขนฺธา จ วิจาโร จ สวิตกฺกสวิจารสฺส วุฏฺฐานสฺส วิตกฺกสฺส จ อนนฺตรปจฺจเยน ปจฺจโย ฯ

[๑๙๓] สวิตกฺกสวิจาโร จ อวิตกฺกวิจารมตฺโต จ ธมฺมา สวิตกฺกสวิจารสฺส ธมฺมสฺส อนนฺตรปจฺจเยน ปจฺจโย ปุริมา ปุริมา สวิตกฺกสวิจารา ขนฺธา จ วิตกฺโก จ ปจฺฉิมานํ ปจฺฉิมานํ สวิตกฺกสวิจารานํ ขนฺธานํ อนนฺตรปจฺจเยน ปจฺจโย อนุโลมญฺจ วิตกฺโก จ โคตฺรภุสฺส อนุโลมญฺจ วิตกฺโก จ โวทานสฺส โคตฺรภุ จ วิตกฺโก จ สวิตกฺกสวิจารสฺส มคฺคสฺส โวทานญฺจ วิตกฺโก จ สวิตกฺกสวิจารสฺส มคฺคสฺส ฯเปฯ สวิตกฺกสวิจาโร มคฺโค จ วิตกฺโก จ สวิตกฺกสวิจารสฺส ผลสฺส สวิตกฺกสวิจารํ ผลญฺจ วิตกฺโก จ สวิตกฺกสวิจารสฺส ผลสฺส อนุโลมญฺจ วิตกฺโก จ สวิตกฺกสวิจาราย ผลสมาปตฺติยา อนนฺตรปจฺจเยน ปจฺจโย ฯ

[๑๙๔] สวิตกฺกสวิจาโร จ อวิตกฺกวิจารมตฺโต จ ธมฺมา อวิตกฺกวิจารมตฺตสฺส ธมฺมสฺส อนนฺตรปจฺจเยน ปจฺจโย ปุริมา ปุริมา สวิตกฺกสวิจารา ขนฺธา จ วิตกฺโก จ ปจฺฉิมสฺส ปจฺฉิมสฺส วิตกฺกสฺส อนนฺตรปจฺจเยน ปจฺจโย สวิตกฺกสวิจารํ จุติจิตฺตญฺจ วิตกฺโก จ อวิตกฺกวิจารมตฺตสฺส อุปปตฺติจิตฺตสฺส อนนฺตรปจฺจเยน ปจฺจโย สวิตกฺกสวิจารา ขนฺธา จ วิตกฺโก จ อวิตกฺกวิจารมตฺตสฺส วุฏฺฐานสฺส อนนฺตรปจฺจเยน ปจฺจโย อวิตกฺกวิจารมตฺตสฺส ฌานสฺส ปริกมฺมญฺจ วิตกฺโก จ อวิตกฺกวิจารมตฺตสฺส ฌานสฺส อนนฺตรปจฺจเยน ปจฺจโย โคตฺรภุ จ วิตกฺโก จ อวิตกฺกวิจารมตฺตสฺส มคฺคสฺส โวทานญฺจ วิตกฺโก จ อวิตกฺกวิจารมตฺตสฺส มคฺคสฺส อนุโลมญฺจ วิตกฺโก จ อวิตกฺกวิจารมตฺตาย8 ผลสมาปตฺติยา อนนฺตรปจฺจเยน ปจฺจโย ฯ