[๔๙๙] เหตุยา นว อารมฺมเณ นว อธิปติยา นว สพฺพตฺถ นว วิปาเก เอกํ อาหาเร นว อวิคเต นว ฯ

[๕๐๐] โนคนฺถํ ธมฺมํ ปฏิจฺจ โนคนฺโถ ธมฺโม อุปฺปชฺชติ นเหตุปจฺจยา: อเหตุกํ โนคนฺถํ เอกํ ขนฺธํ ปฏิจฺจ ตโย ขนฺธา จิตฺตสมุฏฺฐานญฺจ รูปํ เทฺว ขนฺเธ ... อเหตุกปฏิสนฺธิ ยาว อสญฺญสตฺตา วิจิกิจฺฉาสหคเต อุทฺธจฺจสหคเต ขนฺเธ ปฏิจฺจ วิจิกิจฺฉาสหคโต อุทฺธจฺจสหคโต โมโห ฯ

[๕๐๑] คนฺถํ ธมฺมํ ปฏิจฺจ โนคนฺโถ ธมฺโม อุปฺปชฺชติ นอารมฺมณปจฺจยา: คนฺเถ ปฏิจฺจ จิตฺตสมุฏฺฐานํ รูปํ ฯ โนคนฺถํ ธมฺมํ ปฏิจฺจ โนคนฺโถ ธมฺโม อุปฺปชฺชติ นอารมฺมณปจฺจยา: โนคนฺเถ ขนฺเธ ปฏิจฺจ จิตฺตสมุฏฺฐานํ รูปํ ปฏิสนฺธิ ยาว อสญฺญสตฺตา ฯ คนฺถญฺจ โนคนฺถญฺจ ธมฺมํ ปฏิจฺจ โนคนฺโถ ธมฺโม อุปฺปชฺชติ นอารมฺมณปจฺจยา: คนฺเถ จ สมฺปยุตฺตเก จ ขนฺเธ ปฏิจฺจ จิตฺตสมุฏฺฐานํ รูปํ ฯ สงฺขิตฺตํ ฯ นอธิปติปจฺจยา: นว ฯ นอนนฺตรปจฺจยา: ตีณิ ฯ นสมนนฺตรปจฺจยา: ตีณิ ฯ นอญฺญมญฺญปจฺจยา: ตีณิ ฯ นอุปนิสฺสยปจฺจยา: ตีณิ ฯ

[๕๐๒] คนฺถํ ธมฺมํ ปฏิจฺจ คนฺโถ ธมฺโม อุปฺปชฺชติ นปุเรชาตปจฺจยา: อรูเป อิทํสจฺจาภินิเวสํ กายคนฺถํ ปฏิจฺจ อภิชฺฌา กายคนฺโถ อภิชฺฌา กายคนฺถํ ปฏิจฺจ อิทํสจฺจาภินิเวโส กายคนฺโถ ฯ อรูเป สีลพฺพตปรามาโส นตฺถิ เอวํ นว ปญฺหา กาตพฺพา ฯ นปจฺฉาชาตปจฺจยา: นว ฯ นอาเสวนปจฺจยา: นว ฯ นกมฺมปจฺจยา: ตีณิ ฯ นวิปากปจฺจยา: นว ฯ นอาหารปจฺจยา: เอกํ ฯ นอินฺทฺริยปจฺจยา: เอกํ ฯ นฌานปจฺจยา: เอกํ ฯ นมคฺคปจฺจยา: เอกํ ฯ นสมฺปยุตฺตปจฺจยา: ตีณิ ฯ นวิปฺปยุตฺตปจฺจยา: นว ฯ โนนตฺถิปจฺจยา: ตีณิ ฯ โนวิคตปจฺจยา: ตีณิ ฯ