TIPITAKA Volume 43 : PALI ROMAN Sutta Pitaka Vol 35 : Abhi. Pa.(4) Anulomadukapaṭṭhānaṃ pacchimaṃ Pañhāvāro

[864] Saraṇo dhammo saraṇassa dhammassa hetupaccayena paccayo: arūpadukasadisaṃ cattāri.

[865] Saraṇo dhammo saraṇassa dhammassa ārammaṇapaccayena paccayo: rāgaṃ assādeti abhinandati taṃ ārabbha rāgo uppajjati diṭṭhi ... vicikicchā ... uddhaccaṃ ... domanassaṃ uppajjati diṭṭhiṃ assādeti abhinandati vicikicchā ... uddhaccaṃ ... domanassaṃ ārabbha domanassaṃ uppajjati diṭṭhi ... Vicikicchā ... Uddhaccaṃ uppajjati. {865.1} Saraṇo dhammo araṇassa dhammassa ārammaṇapaccayena paccayo: ariyā pahīne kilese ... Vikkhambhite kilese ... Pubbe ... Saraṇe khandhe aniccato ... vipassanti cetopariyañāṇena saraṇacittasamaṅgissa cittaṃ jānanti saraṇā khandhā cetopariyañāṇassa pubbenivāsānussatiñāṇassa yathākammupagañāṇassa anāgataṃsañāṇassa āvajjanāya ārammaṇapaccayena paccayo. {865.2} Araṇo dhammo araṇassa dhammassa ārammaṇapaccayena paccayo: dānaṃ ... sīlaṃ ... Uposathakammaṃ katvā taṃ paccavekkhati pubbe ... jhānā ... ariyā maggā vuṭṭhahitvā maggaṃ paccavekkhanti phalaṃ ... Nibbānaṃ paccavekkhanti nibbānaṃ Gotrabhussa vodānassa maggassa phalassa āvajjanāya ārammaṇapaccayena paccayo cakkhuṃ ... vatthuṃ ... araṇe khandhe aniccato ... Vipassanti .pe. dibbena cakkhunā .pe. anāgataṃsañāṇassa āvajjanāya ārammaṇapaccayena paccayo . araṇo dhammo saraṇassa dhammassa ārammaṇapaccayena paccayo: dānaṃ ... sīlaṃ ... Uposathakammaṃ katvā taṃ assādeti abhinandati taṃ ārabbha rāgo uppajjati .pe. Pubbe ... jhānā ... cakkhuṃ ... Vatthuṃ ... Araṇe khandhe assādeti abhinandati taṃ ārabbha rāgo .pe. Domanassaṃ uppajjati.

[866] Saraṇo dhammo saraṇassa dhammassa adhipatipaccayena paccayo: ārammaṇādhipati sahajātādhipati . ārammaṇādhipati: rāgaṃ garuṃ katvā assādeti abhinandati taṃ garuṃ katvā rāgo uppajjati diṭṭhi uppajjati diṭṭhiṃ garuṃ katvā assādeti abhinandati .pe. Sahajātādhipati: saraṇā adhipati sampayuttakānaṃ khandhānaṃ adhipatipaccayena paccayo. {866.1} Saraṇo dhammo araṇassa dhammassa adhipatipaccayena paccayo: sahajātādhipati: saraṇā adhipati cittasamuṭṭhānānaṃ rūpānaṃ adhipatipaccayena paccayo . saraṇo dhammo saraṇassa ca araṇassa ca dhammassa adhipatipaccayena paccayo: sahajātādhipati: saraṇā adhipati sampayuttakānaṃ khandhānaṃ cittasamuṭṭhānānañca rūpānaṃ adhipatipaccayena paccayo. {866.2} Araṇo dhammo araṇassa dhammassa adhipatipaccayena paccayo: ārammaṇādhipati sahajātādhipati . ārammaṇādhipati: dānaṃ ... Sīlaṃ ... uposathakammaṃ katvā taṃ garuṃ katvā paccavekkhati pubbe ... Jhānā ... ariyā maggā vuṭṭhahitvā maggaṃ garuṃ katvā paccavekkhanti phalaṃ ... nibbānaṃ garuṃ katvā paccavekkhanti nibbānaṃ gotrabhussa vodānassa maggassa phalassa adhipatipaccayena paccayo . sahajātādhipati: araṇā adhipati sampayuttakānaṃ khandhānaṃ cittasamuṭṭhānānañca rūpānaṃ adhipatipaccayena paccayo. {866.3} Araṇo dhammo saraṇassa dhammassa adhipatipaccayena paccayo: ārammaṇādhipati: dānaṃ ... sīlaṃ ... uposathakammaṃ katvā taṃ garuṃ katvā assādeti abhinandati taṃ garuṃ katvā rāgo uppajjati diṭṭhi uppajjati pubbe suciṇṇāni ... Jhānā ... Cakkhuṃ ... Vatthuṃ ... Araṇe khandhe garuṃ katvā assādeti abhinandati taṃ garuṃ katvā rāgo uppajjati diṭṭhi ....