TIPITAKA Volume 43 : PALI ROMAN Sutta Pitaka Vol 35 : Abhi. Pa.(4) Anulomadukapaṭṭhānaṃ pacchimaṃ Saṅkiliṭṭhadukaṃ paṭiccavāro

[511] Saṅkiliṭṭhaṃ dhammaṃ paṭicca saṅkiliṭṭho dhammo uppajjati hetupaccayā: saṅkiliṭṭhaṃ ekaṃ khandhaṃ paṭicca tayo khandhā dve khandhe ... . saṅkiliṭṭhaṃ dhammaṃ paṭicca asaṅkiliṭṭho dhammo uppajjati hetupaccayā: saṅkiliṭṭhe khandhe paṭicca cittasamuṭṭhānaṃ rūpaṃ . Saṅkiliṭṭhaṃ dhammaṃ paṭicca saṅkiliṭṭho ca asaṅkiliṭṭho ca dhammā uppajjanti hetupaccayā: saṅkiliṭṭhaṃ ekaṃ khandhaṃ paṭicca tayo khandhā cittasamuṭṭhānañca rūpaṃ dve khandhe ... . asaṅkiliṭṭhaṃ dhammaṃ paṭicca asaṅkiliṭṭho dhammo uppajjati hetupaccayā: asaṅkiliṭṭhaṃ ekaṃ khandhaṃ paṭicca tayo khandhā cittasamuṭṭhānañca rūpaṃ dve khandhe ... paṭisandhikkhaṇe khandhe paṭicca vatthu vatthuṃ paṭicca khandhā ekaṃ mahābhūtaṃ ... . saṅkiliṭṭhañca asaṅkiliṭṭhañca dhammaṃ paṭicca asaṅkiliṭṭho dhammo uppajjati hetupaccayā: saṅkiliṭṭhe khandhe ca mahābhūte ca paṭicca cittasamuṭṭhānaṃ rūpaṃ. Saṅkhittaṃ.

[512] Hetuyā pañca ārammaṇe dve adhipatiyā pañca anantare dve samanantare dve sahajāte pañca aññamaññe dve nissaye pañca upanissaye dve purejāte dve āsevane dve kamme pañca vipāke ekaṃ āhāre pañca . saṅkhittaṃ . Avigate pañca.

[513] Saṅkiliṭṭhaṃ dhammaṃ paṭicca saṅkiliṭṭho dhammo uppajjati nahetupaccayā: vicikicchāsahagate uddhaccasahagate khandhe paṭicca vicikicchāsahagato uddhaccasahagato moho . asaṅkiliṭṭhaṃ dhammaṃ paṭicca asaṅkiliṭṭho dhammo uppajjati nahetupaccayā: ahetukaṃ asaṅkiliṭṭhaṃ ekaṃ khandhaṃ paṭicca tayo khandhā cittasamuṭṭhānañca rūpaṃ dve khandhe ... Ahetukapaṭisandhi dve yāva asaññasattā.