[480] Hetuyā nava ārammaṇe nava adhipatiyā nava anantare nava samanantare nava sabbattha nava vipāke ekaṃ avigate nava.

[481] Kilesaṃ dhammaṃ paṭicca kileso dhammo uppajjati nahetupaccayā: vicikicchaṃ paṭicca moho uddhaccaṃ paṭicca moho . Nokilesaṃ dhammaṃ paṭicca nokileso dhammo uppajjati nahetupaccayā: ahetukaṃ nokilesaṃ ekaṃ khandhaṃ paṭicca tayo khandhā cittasamuṭṭhānañca rūpaṃ dve khandhe ... ahetukapaṭisandhi yāva asaññasattā . Nokilesaṃ dhammaṃ paṭicca kileso dhammo uppajjati nahetupaccayā: vicikicchāsahagate uddhaccasahagate khandhe paṭicca vicikicchāsahagato uddhaccasahagato moho . kilesañca nokilesañca dhammaṃ paṭicca kileso dhammo uppajjati nahetupaccayā: vicikicchāsahagate khandhe ca vicikicchañca paṭicca vicikicchāsahagato moho uddhaccasahagate khandhe ca uddhaccañca paṭicca uddhaccasahagato moho.

[482] Kilesaṃ dhammaṃ paṭicca nokileso dhammo uppajjati naārammaṇapaccayā: kilese paṭicca cittasamuṭṭhānaṃ rūpaṃ . nokilesaṃ Dhammaṃ paṭicca nokileso dhammo uppajjati naārammaṇapaccayā: nokilese khandhe paṭicca cittasamuṭṭhānaṃ rūpaṃ paṭisandhikkhaṇe khandhe paṭicca vatthu yāva asaññasattā . kilesañca nokilesañca dhammaṃ paṭicca nokileso dhammo uppajjati naārammaṇapaccayā: kilese ca sampayuttake ca khandhe paṭicca cittasamuṭṭhānaṃ rūpaṃ kilese ca mahābhūte ca paṭicca cittasamuṭṭhānaṃ rūpaṃ . ... naadhipati paccayā: naanantarapaccayā: nasamanantarapaccayā: naaññamaññapaccayā: naupanissayapaccayā:.

[483] Kilesaṃ dhammaṃ paṭicca kileso dhammo uppajjati napurejātapaccayā: arūpe lobhaṃ paṭicca moho diṭṭhi thīnaṃ uddhaccaṃ ahirikaṃ anottappaṃ lobhaṃ paṭicca moho diṭṭhi uddhaccaṃ ahirikaṃ anottappaṃ lobhaṃ paṭicca moho māno thīnaṃ uddhaccaṃ ahirikaṃ anottappaṃ lobhaṃ paṭicca moho māno uddhaccaṃ ahirikaṃ anottappaṃ lobhaṃ paṭicca moho thīnaṃ uddhaccaṃ ahirikaṃ anottappaṃ lobhaṃ paṭicca moho uddhaccaṃ ahirikaṃ anottappaṃ vicikicchaṃ paṭicca moho uddhaccaṃ ahirikaṃ anottappaṃ uddhaccaṃ paṭicca moho ahirikaṃ anottappaṃ . Arūpe dosamūlakaṃ natthi . kilesaṃ dhammaṃ paṭicca nokileso dhammo uppajjati napurejātapaccayā: arūpe kilese paṭicca sampayuttakā khandhā kilese paṭicca cittasamuṭṭhānaṃ rūpaṃ . evaṃ navapi pañhā kātabbā. ... Napacchājātapaccayā: naāsevanapaccayā:.