[844] Niyato dhammo aniyatassa dhammassa anantarapaccayena paccayo: maggo phalassa anantarapaccayena paccayo niyatā khandhā vuṭṭhānassa anantarapaccayena paccayo . aniyato dhammo aniyatassa dhammassa anantarapaccayena paccayo: purimā purimā aniyatā khandhā pacchimānaṃ pacchimānaṃ aniyatānaṃ khandhānaṃ anantarapaccayena paccayo anulomaṃ gotrabhussa anulomaṃ vodānassa phalaṃ phalassa anulomaṃ phalasamāpattiyā nirodhā vuṭṭhahantassa nevasaññānāsaññāyatanaṃ Phalasamāpattiyā anantarapaccayena paccayo. {844.1} Aniyato dhammo niyatassa dhammassa anantarapaccayena paccayo: aniyataṃ domanassaṃ niyatassa domanassassa aniyatā micchādiṭṭhi niyatamicchādiṭṭhiyā anantarapaccayena paccayo gotrabhu maggassa vodānaṃ maggassa anantarapaccayena paccayo . ... samantarapaccayena paccayo: sahajātapaccayena paccayo: pañca aññamaññapaccayena paccayo: dve nissayapaccayena paccayo: satta.

[845] Niyato dhammo niyatassa dhammassa upanissayapaccayena paccayo: pakatūpanissayo: mātughātakammaṃ mātughātakammassa pitughātakammassa arahantaghātakammassa ruhiruppādakammassa saṅghabhedakammassa niyatamicchādiṭṭhiyā upanissayapaccayena paccayo . cakkaṃ . paṭhamo maggo dutiyassa maggassa dutiyo maggo tatiyassa maggassa tatiyo maggo catutthassa maggassa upanissayapaccayena paccayo. {845.1} Niyato dhammo aniyatassa dhammassa upanissayapaccayena paccayo: ārammaṇūpanissayo anantarūpanissayo pakatūpanissayo .pe. Pakatūpanissayo: mātaraṃ jīvitā voropetvā .pe. saṅghaṃ bhinditvā tassa paṭighātatthāya dānaṃ ... Sīlaṃ ... Uposathakammaṃ ... Ariyā maggaṃ upanissāya anuppannaṃ samāpattiṃ uppādenti uppannaṃ .pe. ṭhānāṭhānakosallassa upanissayapaccayena paccayo maggo phalasamāpattiyā upanissayapaccayena paccayo. {845.2} Aniyato dhammo aniyatassa dhammassa Upanissayapaccayena paccayo: ārammaṇūpanissayo anantarūpanissayo pakatūpanissayo .pe. pakatūpanissayo: aniyataṃ saddhaṃ upanissāya dānaṃ ... sīlaṃ uposathakammaṃ jhānaṃ vipassanaṃ abhiññaṃ ... samāpattiṃ uppādeti mānaṃ jappeti diṭṭhiṃ gaṇhāti aniyataṃ sīlaṃ .pe. paññaṃ rāgaṃ patthanaṃ kāyikaṃ sukhaṃ kāyikaṃ dukkhaṃ .pe. senāsanaṃ upanissāya dānaṃ .pe. samāpattiṃ uppādeti pāṇaṃ hanati .pe. nigamaghātaṃ ... Aniyatā saddhā .pe. senāsanaṃ aniyatāya saddhāya .pe. patthanāya kāyikassa sukhassa kāyikassa dukkhassa phalasamāpattiyā upanissayapaccayena paccayo. {845.3} Aniyato dhammo niyatassa dhammassa upanissayapaccayena paccayo: ārammaṇūpanissayo anantarūpanissayo pakatūpanissayo .pe. pakatūpanissayo: aniyataṃ rāgaṃ upanissāya mātaraṃ jīvitā voropeti .pe. saṅghaṃ bhindati aniyataṃ domanassaṃ .pe. senāsanaṃ upanissāya mātaraṃ jīvitā voropeti .pe. saṅghaṃ bhindati aniyato rāgo domanassaṃ .pe. senāsanaṃ mātughātakammassa .pe. saṅghabhedakammassa upanissayapaccayena paccayo paṭhamassa maggassa parikammaṃ paṭhamassa maggassa .pe. catutthassa maggassa parikammaṃ catutthassa maggassa upanissayapaccayena paccayo.