[๘๔๖] กุสลํ สอุตฺตรํ ธมฺมํ ปฏิจฺจ กุสโล สอุตฺตโร ธมฺโม อุปฺปชฺชติ เหตุปจฺจยา: ตีณิ ฯ อกุสลํ สอุตฺตรํ ธมฺมํ ปฏิจฺจ อกุสโล สอุตฺตโร ธมฺโม อุปฺปชฺชติ เหตุปจฺจยา: ตีณิ ฯ อพฺยากตํ สอุตฺตรํ ธมฺมํ ปฏิจฺจ อพฺยากโต สอุตฺตโร ธมฺโม อุปฺปชฺชติ เหตุปจฺจยา: ฯ

[๘๔๗] เหตุยา นว อารมฺมเณ ตีณิ อวิคเต นว ฯ สหชาตวาโรปิ สมฺปยุตฺตวาโรปิ ปฏิจฺจวารสทิสา ฯ

[๘๔๘] กุสโล สอุตฺตโร ธมฺโม กุสลสฺส สอุตฺตรสฺส ธมฺมสฺส เหตุปจฺจเยน ปจฺจโย: ตีณิ ฯ อกุสโล สอุตฺตโร ธมฺโม อกุสลสฺส สอุตฺตรสฺส ธมฺมสฺส เหตุปจฺจเยน ปจฺจโย: ตีณิ ฯ อพฺยากโต สอุตฺตโร ธมฺโม อพฺยากตสฺส สอุตฺตรสฺส ธมฺมสฺส เหตุปจฺจเยน ปจฺจโย: ฯ

[๘๔๙] เหตุยา สตฺต อารมฺมเณ นว อธิปติยา นว อวิคเต เตรส ฯ