[๑๖๓๙] ทสฺสเนนปหาตพฺพํ อกุสลํ ธมฺมํ ปฏิจฺจ ทสฺสเนนปหาตพฺโพ อกุสโล ธมฺโม อุปฺปชฺชติ นเหตุปจฺจยา: วิจิกิจฺฉาสหคเต ขนฺเธ ปฏิจฺจ วิจิกิจฺฉาสหคโต โมโห ฯ นทสฺสเนนปหาตพฺพํ อกุสลํ ธมฺมํ ปฏิจฺจ นทสฺสเนนปหาตพฺโพ อกุสโล ธมฺโม อุปฺปชฺชติ นเหตุปจฺจยา: ฯ

[๑๖๔๐] นเหตุยา เทฺว นอธิปติยา เทฺว นปุเรชาเต เทฺว นกมฺเม เทฺว นวิปาเก เทฺว นวิปฺปยุตฺเต เทฺว ฯ สหชาตวาเรปิ ปญฺหาวาเรปิ สพฺพตฺถ วิตฺถาเรตพฺพํ ฯ

[๑๖๔๑] ทสฺสเนนปหาตพฺโพ อกุสโล ธมฺโม ทสฺสเนนปหาตพฺพสฺส อกุสลสฺส ธมฺมสฺส เหตุปจฺจเยน ปจฺจโย: ฯ นทสฺสเนนปหาตพฺโพ อกุสโล ธมฺโม นทสฺสเนนปหาตพฺพสฺส อกุสลสฺส ธมฺมสฺส เหตุปจฺจเยน ปจฺจโย: ฯ

[๑๖๔๒] เหตุยา เทฺว ฯ อารมฺมเณ ตีณิ: ทสฺสเน เอกํ น ทสฺสเน เทฺว ฯ อธิปติยา ตีณิ: ทสฺสนมูลกํ เอกํ น ทสฺสเน เทฺว: อารมฺมณาธิปติ สหชาตาธิปติ เอการมฺมณาธิปติ ฯ อนนฺตเร เทฺว: ทสฺสนมูลกํ เอกํ น ทสฺสเน เอกํ ฯ สมนนฺตเร เทฺว สหชาเต เทฺว ฯเปฯ อุปนิสฺสเย ตีณิ อาเสวเน เทฺว กมฺเม เทฺว อาหาเร เทฺว ฯเปฯ สมฺปยุตฺเต เทฺว อตฺถิยา เทฺว นตฺถิยา เทฺว ฯเปฯ