[๑๑๕] นเหตุยา เอกํ นอารมฺมเณ ปญฺจ นอธิปติยา ฉ โนวิคเต ปญฺจ ฯ สหชาตวาโรปิ สมฺปยุตฺตวาโรปิ วิตฺถาเรตพฺพา ฯ

[๑๑๖] สงฺกิลิฏฺฐสงฺกิเลสิโก นเหตุ ธมฺโม สงฺกิลิฏฺฐสงฺกิเลสิกสฺส นเหตุสฺส ธมฺมสฺส อารมฺมณปจฺจเยน ปจฺจโย: เทฺว ฯ อสงฺกิลิฏฺฐสงฺกิเลสิโก นเหตุ ธมฺโม อสงฺกิลิฏฺฐสงฺกิเลสิกสฺส นเหตุสฺส ธมฺมสฺส อารมฺมณปจฺจเยน ปจฺจโย: เทฺว ฯ อสงฺกิลิฏฺฐอสงฺกิเลสิโก นเหตุ ธมฺโม อสงฺกิลิฏฺฐอสงฺกิเลสิกสฺส นเหตุสฺส ธมฺมสฺส อารมฺมณปจฺจเยน ปจฺจโย: เทฺว ฯ

[๑๑๗] สงฺกิลิฏฺฐสงฺกิเลสิโก นเหตุ ธมฺโม สงฺกิลิฏฺฐสงฺกิเลสิกสฺส นเหตุสฺส ธมฺมสฺส อธิปติปจฺจเยน ปจฺจโย: ตีณิ ฯ อสงฺกิลิฏฺฐสงฺกิเลสิโก นเหตุ ธมฺโม อสงฺกิลิฏฺฐสงฺกิเลสิกสฺส นเหตุสฺส ธมฺมสฺส อธิปติปจฺจเยน ปจฺจโย: เทฺว ฯ อสงฺกิลิฏฺฐอสงฺกิเลสิโก นเหตุ ธมฺโม อสงฺกิลิฏฺฐอสงฺกิเลสิกสฺส นเหตุสฺส ธมฺมสฺส อธิปติปจฺจเยน ปจฺจโย: ตีณิ ฯ

[๑๑๘] อารมฺมเณ ฉ อธิปติยา อฏฺฐ อนนฺตเร สตฺต สมนนฺตเร สตฺต สหชาเต นว อญฺญมญฺเญ ตีณิ นิสฺสเย เตรส อุปนิสฺสเย อฏฺฐ อาเสวเน ตีณิ กมฺเม สตฺต วิปาเก จตฺตาริ อาหาเร นว อวิคเต เตรส ฯ