[๒๒๓] นเหตุปจฺจยา อารมฺมเณ ฉ ฯ ยถา กุสลตฺติเก ปญฺหาวารมฺปิ เอวํ วิตฺถาเรตพฺพํ ฯ

[๒๒๔] อาจยคามึ นเหตุํ ธมฺมํ ปฏิจฺจ อาจยคามี นเหตุ ธมฺโม อุปฺปชฺชติ เหตุปจฺจยา: อาจยคามึ นเหตุํ ธมฺมํ ปฏิจฺจ เนวาจยคามินาปจยคามี นเหตุ ธมฺโม อุปฺปชฺชติ เหตุปจฺจยา: อาจยคามึ นเหตุํ ธมฺมํ ปฏิจฺจ อาจยคามี นเหตุ จ เนวาจยคามินาปจยคามี นเหตุ จ ธมฺมา อุปฺปชฺชนฺติ เหตุปจฺจยา: ฯ อปจยคามึ นเหตุํ ธมฺมํ ปฏิจฺจ อปจยคามี นเหตุ ธมฺโม อุปฺปชฺชติ เหตุปจฺจยา: อปจยคามึ นเหตุํ ธมฺมํ ปฏิจฺจ เนวาจยคามินาปจยคามี นเหตุ ธมฺโม อุปฺปชฺชติ เหตุปจฺจยา: อปจยคามึ นเหตุํ ธมฺมํ ปฏิจฺจ อปจยคามี นเหตุ จ เนวาจยคามินาปจยคามี นเหตุ จ ธมฺมา อุปฺปชฺชนฺติ เหตุปจฺจยา: ฯ เนวาจยคามินาปจยคามึ นเหตุํ ธมฺมํ ปฏิจฺจ เนวาจยคามินาปจยคามี นเหตุ ธมฺโม อุปฺปชฺชติ เหตุปจฺจยา: ฯ อาจยคามึ นเหตุญฺจ เนวาจยคามินาปจยคามึ นเหตุญฺจ ธมฺมํ ปฏิจฺจ เนวาจยคามินาปจยคามี นเหตุ ธมฺโม อุปฺปชฺชติ เหตุปจฺจยา: ฯ อปจยคามึ นเหตุญฺจ เนวาจยคามินาปจยคามึ นเหตุญฺจ ธมฺมํ ปฏิจฺจ เนวาจยคามินาปจยคามี นเหตุ ธมฺโม อุปฺปชฺชติ เหตุปจฺจยา: ฯ

[๒๒๕] อาจยคามึ นเหตุํ ธมฺมํ ปฏิจฺจ อาจยคามี นเหตุ ธมฺโม อุปฺปชฺชติ อารมฺมณปจฺจยา: ฯ อปจยคามึ นเหตุํ ธมฺมํ ปฏิจฺจ อปจยคามี นเหตุ ธมฺโม อุปฺปชฺชติ อารมฺมณปจฺจยา: ฯ เนวาจยคามินาปจยคามึ นเหตุํ ธมฺมํ ปฏิจฺจ เนวาจยคามินาปจยคามี นเหตุ ธมฺโม อุปฺปชฺชติ อารมฺมณปจฺจยา: ฯ

[๒๒๖] เหตุยา นว อารมฺมเณ ตีณิ อธิปติยา นว อวิคเต นว ฯ