[๗๗๕] อกุสลํ ทสฺสเนนปหาตพฺพํ ธมฺมํ ปฏิจฺจ อกุสโล ทสฺสเนนปหาตพฺโพ ธมฺโม อุปฺปชฺชติ เหตุปจฺจยา: ฯ

[๗๗๖] เหตุยา เอกํ อารมฺมเณ เอกํ อวิคเต เอกํ ฯ สหชาตวาเรปิ ปญฺหาวาเรปิ สพฺพตฺถ เอกํ ฯ

[๗๗๗] กุสลํ นทสฺสเนนปหาตพฺพํ ธมฺมํ ปฏิจฺจ กุสโล นทสฺสเนนปหาตพฺโพ ธมฺโม อุปฺปชฺชติ เหตุปจฺจยา: ตีณิ ฯ อกุสลํ นทสฺสเนนปหาตพฺพํ ธมฺมํ ปฏิจฺจ อกุสโล นทสฺสเนนปหาตพฺโพ ธมฺโม อุปฺปชฺชติ เหตุปจฺจยา: ตีณิ ฯ อพฺยากตํ นทสฺสเนนปหาตพฺพํ ธมฺมํ ปฏิจฺจ อพฺยากโต นทสฺสเนนปหาตพฺโพ ธมฺโม อุปฺปชฺชติ เหตุปจฺจยา: ฯ กุสลํ นทสฺสเนนปหาตพฺพญฺจ อพฺยากตํ นทสฺสเนนปหาตพฺพญฺจ ธมฺมํ ปฏิจฺจ อพฺยากโต นทสฺสเนนปหาตพฺโพ ธมฺโม อุปฺปชฺชติ เหตุปจฺจยา: ฯ อกุสลํ นทสฺสเนนปหาตพฺพญฺจ อพฺยากตํ นทสฺสเนนปหาตพฺพญฺจ ธมฺมํ ปฏิจฺจ อพฺยากโต นทสฺสเนนปหาตพฺโพ ธมฺโม อุปฺปชฺชติ เหตุปจฺจยา: ฯ

[๗๗๘] เหตุยา นว อารมฺมเณ ตีณิ อวิคเต นว ฯ สหชาตวาโรปิ สมฺปยุตฺตวาโรปิ ปฏิจฺจวารสทิสา ฯ