เรื่องสุนีธะวัสสการะมหาอำมาตย์

{๒๘๖} สุนีธวสฺสการาติ สุนีโธ จ วสฺสกาโร จ เทฺว พฺราหฺมณา มคธรญฺโญ มหามจฺจา ฯ วชฺชีนํ ปฏิพาหายาติ วชฺชีราชกุลานํ อายมุขานํ ปจฺฉินฺทนตฺถาย ฯ วตฺถูนีติ ฆรวตฺถูนิ ฯ จิตฺตานิ นมนฺติ นิเวสนานิ มาเปตุนฺติ ตา กิร เทวตา วตฺถุวิชฺชาปาฐกานํ สรีเร อธิมุจฺจิตฺวา เอวํ จิตฺตานิ นาเมนฺติ ฯ กสฺมา ฯ อมฺหากํ ยถานุรูปํ สกฺการํ กริสฺสนฺตีติ อตฺโถ ฯ ตาวตึเสหีติ โลเก กิร สกฺกํ เทวราชานํ วิสฺสุกมฺมญฺจ อุปาทาย ตาวตึสา ปณฺฑิตาติ สทฺโท อพฺภุคฺคโต เตเนวาห ตาวตึเสหีติ ฯ ตาวตึเสหิ สทฺธึ มนฺตฺวา วิย มาเปนฺตีติ อตฺโถ ฯ ยาวตา อริยานํ อายตนนฺติ ยตฺตกํ อริยมนุสฺสานํ โอสรณฏฺฐานํ นาม อตฺถิ ฯ ยาวตา วณิชฺชปโถติ ยตฺตกํ วาณิชานํ อาหฏภณฺฑสฺส ราสิวเสเนว กยวิกฺกยฏฺฐานํ นาม อตฺถีติ อตฺโถ ฯ อิทํ อคฺคนครนฺติ เตสํ อริยายตนํ วณิชฺชฏฺฐานํ อิทํ อคฺคนครํ ภวิสฺสติ ฯ ปุฏเภทนนฺติ ภณฺฑปุฏเภทนฏฺฐานํ ภณฺฑคณฺฑิกานํ โมจนฏฺฐานนฺติ วุตฺตํ โหติ ฯ อคฺคิโต วาติอาทีสุ สมุจฺจยตฺเถ วาสทฺโท ฯ ตตฺร หิ เอกสฺส โกฏฺฐาสสฺส อคฺคิโต เอกสฺส อุทกโต เอกสฺส อพฺภนฺตรโต อญฺญมญฺญสฺส เภทา อนฺตราโย ภวิสฺสติ ฯ อุฬุมฺปนฺติ ปารํ คมนตฺถาย อาณิโย อาโกเฏตฺวา กตํ ฯ กุลฺลนฺติ วลฺลิอาทีหิ พนฺธิตฺวา กตํ ฯ อณฺณวนฺติ สพฺพนฺติเมน ปริจฺเฉเทน โยชนมตฺตํ คมฺภีรสฺส จ ปุถุลสฺส จ อุทกฏฺฐานสฺเสตํ อธิวจนํ ฯ สรนฺติ อิธ นที อธิปฺเปตา ฯ อิทํ วุตฺตํ โหติ เย คมฺภีรวิตฺถตํ ตณฺหาสรํ ตรนฺติ เต อริยมคฺคสงฺขาตํ เสตุํ กตฺวาน วิสฺสชฺช ปลฺลลานิ อนามสิตฺวาว อุทกภริตานิ นินฺนฏฺฐานานิ อยมฺปน อิมํ อปฺปมตฺตกํ อุทกํ อุตฺตริตุกาโมปิ กุลฺลํ หิ ชโน ปพนฺธติ พุทฺธา ปน พุทฺธสาวกา จ วินา เอว กุลฺเลน ติณฺณา เมธาวิโน ชนาติ ฯ

{๒๘๗} อนนุโพธาติ อพุชฺฌเนน ฯ สนฺธาวิตนฺติ ภวโต ภวงฺคมนวเสน สนฺธาวิตํ ฯ สํสริตนฺติ ปุนปฺปุนํ คมนวเสน สํสริตํ ฯ มมญฺเจว ตุมฺหากญฺจาติ มยา จ ตุมฺเหหิ จ ฯ อถวา สนฺธาวิตํ สํสริตนฺติ สนฺธาวิตํ สํสริตํ มมญฺเจว ตุมฺหากญฺจ อโหสีติ เอวเมตฺถ อตฺโถ ทฏฺฐพฺโพ ฯ สํสิตนฺติ สํสริตํ ฯ ภวเนตฺตี สมูหตาติ ภวโต คมนา สนฺธาวนา ตณฺหารชฺชุ สุฏฺฐุ หตา ฉินฺนา อปฺปวตฺติ กตา ฯ