{๓๔๒} โย น ฉนฺทาคตึ คจฺฉตีติอาทีสุ จีวรปฏิคฺคาหเกสุ ปจฺฉา อาคตานมฺปิ อตฺตโน ญาตกาทีนํ ปฐมตรํ ปฏิคฺคณฺหนฺโต วา เอกจฺจสฺมึ เปมํ ทสฺเสตฺวา คณฺหนฺโต วา โลภปกติตาย อตฺตโน ปริณาเมนฺโต วา ฉนฺทาคตึ คจฺฉติ นาม ฯ โย ปฐมตรํ อาคตสฺสาปิ โกธวเสน ปจฺฉา คณฺหนฺโต วา ทุคฺคตมนุสฺเสสุ อวณฺณํ กตฺวา คณฺหนฺโต วา กึ โว ฆเร ฐปิโตกาโส นตฺถิ ตุมฺหากํ สนฺตกํ คเหตฺวา คจฺฉถาติ เอวํ สงฺฆสฺส ลาภนฺตรายํ กโรนฺโต วา โทสาคตึ คจฺฉติ นาม ฯ โย ปน มุฏฺฐสฺสติ อสมฺปชาโน อยํ โมหาคตึ คจฺฉติ นาม ฯ ปจฺฉา อาคตานมฺปิ อิสฺสรานํ ภเยน ปฐมตรํ ปฏิคฺคณฺหนฺโต วา จีวรปฏิคฺคาหกฏฺฐานนฺตรเมตํ ภาริยนฺติ สนฺตสนฺโต วา ภยาคตึ คจฺฉติ นาม ฯ มยา อิทญฺจิทญฺจ คหิตํ อิทญฺจ น คหิตนฺติ ชานนฺโต คหิตาคหิตญฺจ ชานาติ นาม ฯ ตสฺมา โย น ฉนฺทาคติอาทิวเสน คจฺฉติ ญาตกอญฺญาตกอฑฺฒทุคฺคเตสุ วิเสสํ อกตฺวา อาคตปฏิปาฏิยา คณฺหาติ สีลาจารปฏิปตฺติสํยุตฺโต โหติ สติมา เมธาวี พหุสฺสุโต สกฺโกติ ทายกานํ วิสฺสฏฺฐาย วาจาย ปริมณฺฑเลหิ ปทพฺยญฺชเนหิ อนุโมทนํ กโรนฺโต ปสาทํ ชเนตุํ เอวรูโป สมฺมนฺนิตพฺโพติ ฯ เอวญฺจ ปน ภิกฺขเว สมฺมนฺนิตพฺโพติ เอตฺถ ปน เอตาย ยถาวุตฺตาย กมฺมวาจายปิ อปโลกเนนปิ อนฺโตวิหาเร สพฺพสงฺฆมชฺเฌปิ ขณฺฑสีมายปิ สมฺมนฺนิตุํ วฏฺฏติเยว ฯ เอวํ สมฺมเตน จ วิหารปจฺจนฺเต วา ปธานฆเร วา น อจฺฉิตพฺพํ ฯ ยตฺถ ปน อาคตา มนุสฺสา สุขํ ปสฺสนฺติ ตาทิเส ธุรวิหารฏฺฐาเน วีชนึ ปสฺเส ฐเปตฺวา สุวิวตฺเถน สุปารุเตน นิสีทิตพฺพนฺติ ฯ ตตฺเถว อุชฺฌิตฺวาติ ปฏิคฺคหณเมว อมฺหากํ ภาโรติ วตฺวา คหิตฏฺฐาเนเยว ฉฑฺเฑตฺวา คจฺฉนฺติ ฯ จีวรปฏิคฺคาหกนฺติ โย คหปติเกหิ สงฺฆสฺส ทียมานํ จีวรํ คณฺหาติ ฯ จีวรนิทาหกนฺติ จีวรปฏิสามนกํ ฯ โย น ฉนฺทาคตินฺติอาทีสุ เจตฺถ อิโต ปรํ สพฺพตฺถ วุตฺตนเยเนว วินิจฺฉโย เวทิตพฺโพ ฯ สมฺมติวินิจฺฉโยปิ กถิตานุสาเรเนว ชานิตพฺโพ ฯ

{๓๔๓} วิหารํ วาติอาทีสุ โย อารามมชฺเฌ อารามิกสามเณราทีหิ อวิวิตฺโต สพฺเพสํ สโมสรณฏฺฐาเน วิหาโร วา อฑฺฒโยโค วา โหติ โส น สมฺมนฺนิตพฺโพ ฯ ปจฺจนฺตเสนาสนํ ปน น สมฺมนฺนิตพฺพํ ฯ อิทํ ปน ภณฺฑาคารํ ขณฺฑสีมํ คนฺตฺวา ขณฺฑสีมายํ นิสินฺเนหิ สมฺมนฺนิตุํ น วฏฺฏติ วิหารมชฺเฌเยว สมฺมนฺนิตพฺพํ ฯ คุตฺตาคุตฺตญฺจ ชาเนยฺยาติ เอตฺถ ยสฺส ตาว ฉทนาทีสุ โกจิ โทโส นตฺถิ ตํ คุตฺตํ นาม ฯ ยสฺส ปน ฉทนติณํ วา ฉทนิฏฺฐกา วา ยตฺถ กตฺถจิ ปติตา เยน โอวสฺสติ วา มูสิกาทีนํ วา ปเวโส โหติ ภิตฺติอาทีสุ วา กตฺถ ฉิทฺทํ โหติ อุปจิกา วา อุฏฺฐหนฺติ ตํ สพฺพํ อคุตฺตํ นาม ฯ ตํ สลฺลกฺเขตฺวา ปฏิสงฺขริตพฺพํ ฯ สีตสมเย ทฺวารญฺจ วาตปานญฺจ สุปิทหิตํ กาตพฺพํ สีเตน หิ จีวรานิ กณฺณกิตานิ โหนฺติ ฯ อุณฺหสมเย อนฺตรนฺตรา วาตปเวสนตฺถํ วิวริตพฺพํ ฯ เอวํ กโรนฺโต หิ คุตฺตาคุตฺตํ ชานาติ นาม ฯ อิเมหิ ปน จีวรปฏิคฺคาหกาทีหิ ตีหิปิ อตฺตโน วตฺตํ ชานิตพฺพํ ตตฺถ จีวรปฏิคฺคาหเกน ตาว ยํ ยํ มนุสฺสา กาลจีวรนฺติ วา อกาลจีวรนฺติ วา อจฺเจกจีวรนฺติ วา วสฺสิกสาฏิกนฺติ วา นิสีทนนฺติ วา ปจฺจตฺถรณนฺติ วา มุขปุญฺฉนโจลนฺติ วา เทนฺติ ตํ สพฺพํ เอกราสึ กตฺวา มิสฺเสตฺวา น คณฺหิตพฺพํ วิสุํ วิสุํ กตฺวาว คณฺหิตฺวา จีวรนิทาหกสฺส ตเถว อาจิกฺขิตฺวา ทาตพฺพํ ฯ จีวรนิทาหเกนาปิ ภณฺฑาคาริกสฺส ททมาเนน อิทํ กาลจีวรํ ฯเปฯ อิทํ มุขปุญฺฉนโจลนฺติ อาจิกฺขิตฺวา ว ทาตพฺพํ ฯ ภณฺฑาคาริเกนาปิ ตเถว วิสุํ วิสุํ สญฺญาณํ กตฺวา ฐเปตพฺพํ ฯ ตโต สงฺเฆน กาลจีวรํ อาหราติ วุตฺเต กาลจีวรเมว ทาตพฺพํ ฯเปฯ มุขปุญฺฉนโจลกํ อาหราติ วุตฺเต ตเทว ทาตพฺพํ ฯ