{๓๔๔} ฉกเนนาติ โคมเยน ฯ ปณฺฑุมตฺติกายาติ ตมฺพมตฺติกาย ฯ มูลรชนาทีสุ หลิทฺทํ ฐเปตฺวา สพฺพํ มูลรชนํ วฏฺฏติ ฯ มญฺเชฏฺฐญฺจ ตุงฺคหารญฺจ ฐเปตฺวา สพฺพํ ขนฺธรชนํ วฏฺฏติ ฯ ตุงฺคหาโร นาม เอโก กณฺฏกรุกฺโข ตสฺส หริตาลวณฺณํ ขนฺธรชนํ โหติ ฯ โลทฺทญฺจ กณฺฑลญฺจ ฐเปตฺวา สพฺพํ ตจรชนํ วฏฺฏติ ฯ อลฺลิปตฺตญฺจ นิลิปตฺตญฺจ ฐเปตฺวา สพฺพํ ปตฺตรชนํ วฏฺฏติ ฯ คิหิปริภุตฺตํ ปน อลฺลิปตฺเตน เอกวารํ รชิตุํ วฏฺฏติ ฯ กึสุกปุปฺผญฺจ กุสุมฺภปุปฺผญฺจ ฐเปตฺวา สพฺพํ ปุปฺผรชนํ วฏฺฏติ ฯ ผลรชเน ปน น กิญฺจิ น วฏฺฏติ ฯ สีตุทกาติ อปกฺกรชํ วุจฺจติ ฯ อุตฺตราฬุวนฺติ วฏฺฏาธารกํ ฯ รชนกุมฺภิยา มชฺเฌ ฐเปตฺวา ตํ อาธารกํ ปริกฺขิปิตฺวา รชนํ ปกฺขิปิตุํ อนุชานามีติ อตฺโถ ฯ เอวํ หิ กเต รชนํ น อุตฺตรติ ฯ อุทเก วา นขปิฏฺฐิกาย วาติ สเจ หิ ปกฺกํ โหติ อุทกปาฏิยา ทินฺโน เถโว สหสา น วิสรติ นขปิฏฺฐิยํปิ อวิสรนฺโต ติฏฺฐติ ฯ รชนุลุงฺกนฺติ รชนอุลุงฺกํ ฯ ทณฺฑกถาลิกนฺติ ตเมว สทณฺฑกํ ฯ รชนโกลมฺพนฺติ รชนกุณฺฑํ ฯ มทฺทนฺตีติ โอมทฺทนฺติ ฯ น จ อจฺฉินฺเน เถเว ปกฺกมิตุนฺติ ยาว รชนพินฺทุ คลิตํ น ฉิชฺชติ ตาว อญฺญตฺร น คนฺตพฺพํ ฯ ปตฺถินฺนนฺติ อติรชิตตฺตา ถทฺธํ อติภริตนฺติ อตฺโถ ฯ อุทเก โอสาเทตุนฺติ อุทเก ปกฺขิปิตฺวา ฐเปตุํ ฯ รชเน ปน นิกฺขนฺเต ตํ อุทกํ ฉฑฺเฑตฺวา จีวรํ มทฺทิตพฺพํ ฯ ทนฺตกสาวานีติ เอกํ วา เทฺว วา วาเร รชิตฺวา ทนฺตวณฺณานิ ธาเรนฺติ ฯ