{๓๔๕} อจฺจิพทฺธนฺติ จตุรสฺสเกทารกพทฺธํ ฯ ปาลิพทฺธนฺติ อายามโต จ วิตฺถารโต จ ทีฆมริยาทพทฺธํ ฯ มริยาทพทฺธนฺติ อนฺตรนฺตรา รสฺสมริยาทาย มริยาทพทฺธํ ฯ สิงฺฆาฏกพทฺธนฺติ มริยาทาย มริยาทํ วินิวิชฺฌิตฺวา คตฏฺฐาเนน สิงฺฆาฏกพทฺธํ จตุกฺกสณฺฐานนฺติ อตฺโถ ฯ อุสฺสหสิ ตฺวํ อานนฺทาติ สกฺโกสิ ตฺวํ อานนฺท ฯ สํวิทหิตุนฺติ กาตุํ ฯ อุสฺสหามิ ภควาติ ตุมฺเหหิ ทินฺนนเยน สกฺโกมีติ ทสฺเสติ ฯ ยตฺร หิ นามาติ โย นาม ฯ กุสิมฺปิ นามาติอาทีสุ กุสีติ อายามโต จ วิตฺถารโต จ อนุวาตาทีนํ ทีฆปฏานเมตํ อธิวจนํ ฯ อฑฺฒกุสีติ อนฺตรนฺตรา รสฺสปฏานํ นามํ ฯ มณฺฑลนฺติ ปญฺจขณฺฑิกจีวรสฺส เอเกกสฺมึ ขณฺเฑ มหามณฺฑลํ ฯ อฑฺฒมณฺฑลนฺติ ขุทฺทกมณฺฑลํ ฯ วิวฏฺฏนฺติ มณฺฑลญฺจ อฑฺฒมณฺฑลญฺจ เอกโต กตฺวา สิพฺพิตํ มชฺฌิมขณฺฑํ ฯ อนุวิวฏฺฏนฺติ ตสฺส อุโภสุ ปสฺเสสุ เทฺว ขณฺฑานิ ฯ คีเวยฺยกนฺติ คีวเวฏฺฐนฏฺฐาเน ทฬฺหีกรณตฺถํ อญฺญํ สุตฺตสํสิพฺพิตํ อาคนฺตุกปฏํ ฯ ชงฺเฆยฺยกนฺติ ชงฺฆปาปุณฏฺฐาเน ตเถว สํสิพฺพิตํ ปฏํ ฯ คีวฏฺฐาเน จ ชงฺฆฏฺฐาเน จ ฐปิตปฏานเมตํ นามนฺติปิ วทนฺติ ฯ พาหนฺตนฺติ อนุวิวฏฺฏานํ พหิ เอเกกํ ขณฺฑํ ฯ อิติ ปญฺจขณฺฑิกจีวเรเนตํ วิจาริตนฺติ ฯ อถวา อนุวิวฏฺฏนฺติ วิวฏฺฏสฺส เอกปสฺสโต ทฺวินฺนํ เอกปสฺสโต ติณฺณํปิ จตุนฺนํปิ ขณฺฑานเมตํ นามํ ฯ พาหนฺตนฺติ สุปฺปมาณจีวรํ ปารุปนฺเตน สํหริตฺวา พาหาย อุปริ ฐปิตา อุโภ อนฺตา พหิมุขา ติฏฺฐนฺติ เตสํ เอตํ นามํ ฯ อยเมว หิ นโย มหาอฏฺฐกถายํ วุตฺโตติ ฯ

{๓๔๖} จีวเรหิ อุพฺภณฺฑิกเตติ จีวเรหิ อุพฺภณฺฑิกเต ยถา อุกฺขิตฺตภณฺฑา โหนฺติ เอวํ กเต อุกฺขิตฺตภณฺฑิกภาวํ อาปาทิเตติ อตฺโถ ฯ จีวรภิสินฺติ เอตฺถ ภิสีติ เทฺว ตีณิ เอกโต กตฺวา ภิสิสงฺเขเปน สํหริตจีวรานิ วุตฺตานิ ฯ เต กิร ภิกฺขู ทกฺขิณาคิริโต ภควา ลหุํ ปฏินิวตฺติสฺสตีติ ตตฺถ คจฺฉนฺตา ชีวกวตฺถุสฺมึ ลทฺธจีวรานิ ฐเปตฺวา อคมํสุ ฯ อิทานิ ปน จีวเรน อาคมิสฺสตีติ มญฺญมานา อาทาย ปกฺกมึสุ ฯ อนฺตรฏฺฐกาสูติ มาฆสฺส จ ผคฺคุณสฺส จ อนฺตรา อฏฺฐํสุ ฯ น ภควนฺตํ สีตํ อโหสีติ ภควโต สีตํ นาโหสิ ฯ สีตาลุกาติ สีตปกติกา เย ปกติยาว สีเตน กิลมนฺติ ฯ เอตทโหสิ เยปิ โข เต กุลปุตฺตาติ น ภควา อชฺโฌกาเส อนิสีทิตฺวา เอมตฺถํ น ชานาติ มหาชนสฺส สญฺญาปนตฺถํ ปน เอวมกาสิ ฯ ทฺวิคุณํ สงฺฆาฏินฺติ ทุปฏฺฏํ สงฺฆาฏึ ฯ เอกจฺจิยนฺติ เอกปฏฺฏํ ฯ อิติ ภควา อตฺตนา จตูหิ จีวเรหิ ยาเปติ อมฺหากมฺปน ติจีวรํ อนุชานาตีติ วจนสฺส โอกาสํ อุปจฺฉินฺทิตุํ ทฺวิคุณํ สงฺฆาฏึ อนุชานาติ เอกจฺจิเก อิตเร เอวญฺหิ เนสํ จตฺตาริ ภวิสฺสนฺตีติ ฯ {๓๔๘} อคฺคฬํ อจฺฉุเปยฺยนฺติ ฉินฺนฏฺฐาเน ปิโลติกขณฺฑํ ฐเปยฺยํ ฯ อหตกปฺปานนฺติ เอกวารโธตานํ ฯ อุตุทฺธตานนฺติ อุตุโต ทีฆกาลโต อุทฺธตานํ คตวตฺถุกานํ ปิโลติกานนฺติ วุตฺตํ โหติ ฯ ปาปณิเกติ อนฺตราปณโต ปติตปิโลติกจีวเร ฯ อุสฺสาโห กรณีโยติ ปริเยสนา กาตพฺพา ฯ ปริจฺเฉโท ปน นตฺถิ ปฏฺฏสตํปิ วฏฺฏติ ฯ สพฺพมิทํ สาทิยนฺตสฺส ภิกฺขุโน วุตฺตํ ฯ อคฺคฬํ ตุนฺนนฺติ เอตฺถ อุทฺธริตฺวา อลฺลิยาปนขณฺฑํ อคฺคฬํ สุตฺตเกน สํสิพฺพนํ ตุนฺนํ วิชฺฌิตฺวา กรณํ โอวฏฺฏิกํ กณฺฑูสกํ วุจฺจติ มุทฺทิกา ฯ ทฬฺหีกมฺมนฺติ อนุทฺธริตฺวาว อุปสฺสยํ กตฺวา อลฺลิยาปนกํ วตฺถขณฺฑํ ฯ