{๓๗๙} อิทานิ อาทิโต ปฏฺฐาย วุตฺตจีวรานํ ปฏิลาภเขตฺตํ ทสฺเสตุํ อฏฺฐิมา ภิกฺขเว มาติกาติอาทิมาห ฯ สีมาย เทตีติอาทิ ปุคฺคลาธิฏฺฐานนเยน วุตฺตํ ฯ เอตฺถ จ สีมาย ทานํ ปฐมมาติกา กติกาย ทานํ ทุติยา ฯเปฯ ปุคฺคลสฺส ทานํ อฏฺฐมา ฯ ตตฺถ สีมาย ทมฺมีติ เอวํ สีมํ ปรามสิตฺวา เทนฺโต สีมาย เทติ นาม ฯ เอเสว นโย สพฺพตฺถ ฯ สีมาย เทติ ยาวติกา ภิกฺขู อนฺโตสีมคตา เตหิ ภาเชตพฺพนฺติอาทิมฺหิ ปน มาติกานิทฺเทเส สีมาย เทตีติ เอตฺถ ตาว ขณฺฑสีมา อุปจารสีมา สมานสํวาสสีมา อวิปฺปวาสสีมา ลาภสีมา คามสีมา นิคมสีมา นครสีมา อพฺภนฺตรสีมา อุทกุกฺเขปสีมา ชนปทสีมา รฏฺฐสีมา รชฺชสีมา ทีปสีมา จกฺกวาฬสีมา อิติ ปณฺณรส สีมา เวทิตพฺพา ฯ ตตฺถ ขณฺฑสีมา สีมากถาย วุตฺตาว ฯ อุปจารสีมา ปริกฺขิตฺตสฺส วิหารสฺส ปริกฺเขเปน อปริกฺขิตฺตสฺส ปริกฺเขปารหฏฺฐาเนน ปริจฺฉินฺนา โหติ ฯ อปิจ ภิกฺขูนํ ธุวสนฺนิปาตฏฺฐานโต วา ปริยนฺเต ฐิตโภชนสาลโต วา นิวทฺธวสนกอาวาสโต วา ถามมชฺฌิมสฺส ปุริสสฺส ทฺวินฺนํ เลฑฺฑุปาตานํ อนฺโต อุปจารสีมา เวทิตพฺพา ฯ สา ปน อาวาเสสุ วฑฺฒนฺเตสุ วฑฺฒติ ปริหายนฺเตสุ ปริหายติ ฯ มหาปจฺจริยํ ปน สา ลาภวเสน ภิกฺขูสุ วฑฺฒนฺเตสุ วฑฺฒตีติ วุตฺตํ ฯ สเจ วิหาเร สนฺนิปติตภิกฺขูหิ สทฺธึ เอกพทฺธา หุตฺวา โยชนสตํปิ ปูเรตฺวา นิสีทนฺติ โยชนสตมฺปิ อุปจารสีมาว โหติ สพฺเพสํ ลาโภ ปาปุณาติ ฯ สมานสํวาสอวิปฺปวาสสีมาทฺวยํปิ วุตฺตนยเมว ฯ

ลาภสีมา นาม เนว สมฺมาสมฺพุทฺเธน อนุญฺญาตา น ธมฺมสงฺคาหกตฺเถเรหิ ฐปิตา อปิจ โข ราชราชมหามตฺตา วิหารํ การาเปตฺวา คาวุตํ วา อฑฺฒโยชนํ วา โยชนํ วา สมนฺตโต ปริจฺฉินฺทิตฺวา อยํ อมฺหากํ วิหารสฺส ลาภสีมาติ นามลิขิตตฺถมฺเภ นิขนิตฺวา ยํ เอตฺถนฺตเร อุปฺปชฺชติ สพฺพํ ตํ อมฺหากํ วิหารสฺส เทมาติ สีมํ ฐเปนฺติ อยํ ลาภสีมา นาม ฯ คามนิคม- นครอพฺภนฺตรอุทกุกฺเขปสีมาปิ วุตฺตาเยว ฯ ชนปทสีมา นาม กาสิโกสลรฏฺฐาทีนํ อนฺโต พหู ชนปทา โหนฺติ ตตฺถ เอเกโก ชนปทปริจฺเฉโท ชนปทสีมา นาม ฯ รฏฺฐสีมา นาม กาสิโกสลาทิ- รฏฺฐปริจฺเฉโท ฯ รชฺชสีมา นาม พลิโภโค โจลโภโค เกรฏฺฐโภโคติ เอวเมเกกสฺส รญฺโญ อาณาปวตฺติฏฺฐานํ ฯ ทีปสีมา นาม สมุทฺทนฺเตน ปริจฺฉินฺนา มหาทีปา จ อนฺตรทีปา จ ฯ จกฺกวาฬสีมา นาม จกฺกวาฬปพฺพเตเนว ปริจฺฉินฺนา ฯ เอวเมตาสุ สีมาสุ ขณฺฑสีมาย เกนจิ กมฺเมน สนฺนิปติตํ สงฺฆํ ทิสฺวา เอตฺเถว สีมาย สงฺฆสฺส เทมาติ วุตฺเต ยาวติกา ภิกฺขู อนฺโตขณฺฑสีมคตา เตหิ ภาเชตพฺพํ ฯ เตสํเยว หิ ตํ ปาปุณาติ ฯ อญฺเญสํ สีมนฺตริกาย วา อุปจารสีมาย วา ฐิตานมฺปิ น ปาปุณาติ ฯ ขณฺฑสีมาย อุฏฺฐิเต ปน รุกฺเข วา ปพฺพเต วา ฐิตสฺส เหฏฺฐา วา ปฐวีเวมชฺฌคตสฺส ปาปุณาติเยว ฯ อิมิสฺสา อุปจารสีมาย สงฺฆสฺส ทมฺมีติ ทินฺนมฺปน ขณฺฑสีมสีมนฺตริกาสุ ฐิตานํปิ ปาปุณาติ ฯ สมานสํวาสสีมาย ทมฺมีติ ทินฺนํ ปน ขณฺฑสีมสีมนฺตริกาสุ ฐิตานํ น ปาปุณาติ ฯ อวิปฺปวาสสีมาลาภสีมาสุ ทินฺนํ ตาสุ สีมาสุ อนฺโตคตานํ ปาปุณาติ ฯ คามสีมาทีสุ ทินฺนมฺปน ตาสํ สีมานํ อพฺภนฺตเร พทฺธสีมาย ฐิตานมฺปิ ปาปุณาติ ฯ อพฺภนฺตรสีม- อุทกุกฺเขปสีมาสุ ทินฺนํ ตตฺถ อนฺโตคตานํเยว ปาปุณาติ ฯ ชนปทรฏฺฐรชฺชทีปจกฺกวาฬสีมาสุ คามสีมาทีสุ วุตฺตสทิโสเยว วินิจฺฉโย ฯ