สเจ ปน ชมฺพูทีเป ฐิโต ตามฺพปณฺณิทีเป สงฺฆสฺส ทมฺมีติ วทติ ตามฺพปณฺณิทีปโต เอโกปิ คนฺตฺวา สพฺเพสํ คณฺหิตุํ ลภติ ฯ สเจปิ ตตฺเรว เอโก สภาคภิกฺขุ สภาคานํ ภาคํ คณฺหาติ น วาเรตพฺโพ ฯ เอวํ ตาว โย สีมํ ปรามสิตฺวา เทติ ตสฺส ทาเน วินิจฺฉโย เวทิตพฺโพ ฯ โย ปน อสุกสีมายนฺติ วตฺตุํ น ชานาติ เกวลํ สีมาติ วจนมตฺตเมว ชานนฺโต วิหารํ อาคนฺตฺวา สีมาย ทมฺมีติ วา สีมฏฺฐกสงฺฆสฺส ทมฺมีติ วา ภณติ โส ปุจฺฉิตพฺโพ สีมา นาม พหุวิธา กตรสีมํ สนฺธาย ภณสีติ ฯ สเจ วทติ อหํ อสุกสีมาติ น ชานามิ สีมฏฺฐกสงฺโฆ ภาเชตฺวา คณฺหาตูติ กตรสีมาย ภาเชตพฺพํ ฯ มหาสีวตฺเถโร กิราห อวิปฺปวาสสีมายาติ ฯ ตโต นํ อาหํสุ อวิปฺปวาสสีมา นาม ติโยชนาปิ โหติ เอวํ สนฺเต ติโยชเน ฐิตา ลาภํ คณฺหิสฺสนฺติ ติโยชเน ฐตฺวา อาคนฺตุกวตฺตํ ปูเรตฺวา อารามํ ปวิสิตพฺพํ ภวิสฺสติ คมิโก ติโยชนํ คนฺตฺวา เสนาสนํ อาปุจฺฉิสฺสติ นิสฺสยปฏิปนฺนสฺส ติโยชนาติกฺกเม นิสฺสโย ปฏิปฺปสฺสมฺภิสฺสติ ปาริวาสิเกน ติโยชนํ อติกฺกมิตฺวา อรุณํ อุปฏฺฐาเปตพฺพํ ภวิสฺสติ ภิกฺขุนิยา ติโยชเน ฐตฺวา อารามปฺปเวสนํ อาปุจฺฉิตพฺพํ ภวิสฺสติ สพฺพเมตํ อุปจารสีมาย ปริจฺเฉทวเสเนว กาตุํ วฏฺฏติ ตสฺมา อุปจารสีมายเมว ภาเชตพฺพนฺติ ฯ

กติกายาติ สมานลาภกติกาย ฯ เตเนวาห สมฺพหุลา อาวาสา สมานลาภา โหนฺตีติ ฯ ตตฺเรวํ กติกา กาตพฺพา เอกสฺมึ วิหาเร สนฺนิปติเตหิ ภิกฺขูหิ ยํ วิหารํ สงฺคหิตุกามา สมานลาภํ กาตุํ อิจฺฉนฺติ ตสฺส นามํ คเหตฺวา อสุโก นาม วิหาโร โปราณโกติ วา พุทฺธาธิวุตฺโถติ วา อปฺปลาโภติ วา ยงฺกิญฺจิ การณํ วตฺวา ตํ วิหารํ อิมินาปิ วิหาเรน สทฺธึ เอกลาภํ กาตุํ สงฺฆสฺส รุจฺจตีติ ติกฺขตฺตุํ สาเวตพฺพํ ฯ เอตฺตาวตา ตสฺมึ วิหาเร นิสินฺโนปิ อิธ นิสินฺโนว โหติ ตสฺมึ วิหาเรปิ สงฺเฆน เอวเมว กาตพฺพํ ฯ เอตฺตาวตา อิธ นิสินฺโนปิ ตสฺมึ นิสินฺโนว โหติ ฯ เอกสฺมึ ภาชิยมาเน อิตรสฺมึ ฐิตสฺส ภาคํ คเหตุํ วฏฺฏติ ฯ เอวํ เอเกน วิหาเรน สทฺธึ พหูปิ อาวาสา เอกลาภา กาตพฺพา ฯ

ภิกฺขาปญฺญตฺติยาติ อตฺตโน ปริจฺจาคปญฺญาปนฏฺฐาเน ฯ เตเนวาห ยตฺถ สงฺฆสฺส ธุวการา กริยนฺตีติ ฯ ตสฺสตฺโถ ยสฺมึ วิหาเร อิมสฺส จีวรทายกสฺส สนฺตกํ สงฺฆสฺส ปากวตฺตํ วา วตฺตติ ยสฺมึ วา วิหาเร ภิกฺขู อตฺตโน ภารํ กตฺวา สทา เคเห โภเชติ ยตฺถ วา เตน อาวาโส การิโต สลากภตฺตาทีนิ วา นิพทฺธานิ เยน ปน สกโลปิ วิหาโร ปติฏฺฐาปิโต ตตฺถ วตฺตพฺพเมว นตฺถิ อิเม ธุวการา นาม ตสฺมา สเจ โส ยตฺถ มยฺหํ ธุวการา กริยนฺติ ตตฺถ ทมฺมีติ วา ตตฺถ เทถาติ วา ภณติ พหูสุ เจปิ ฐาเนสุ ธุวการา โหนฺติ สพฺพตฺถ ทินฺนเมว โหติ ฯ สเจ ปน เอกสฺมึ วิหาเร ภิกฺขู พหุตรา โหนฺติ เตหิ วตฺตพฺพํ ตุมฺหากํ ธุวกาเร เอกตฺถ ภิกฺขู พหู เอกตฺถ อปฺปกาติ ฯ สเจ ภิกฺขุคณนาย คณฺหถาติ ภณติ ตถา ภาเชตฺวา คณฺหิตุํ วฏฺฏติ ฯ เอตฺถ จ วตฺถเภสชฺชาทิ อปฺปกํปิ สุเขน ภาชิยติ ฯ ยทิ ปน มญฺโจ วา ปีฐกํ วา เอกเมว โหติ ตํ ปุจฺฉิตฺวา ยสฺส วา วิหารสฺส เอกวิหาเรปิ วา ยสฺส เสนาสนสฺส โส วิจาเรติ ตตฺถ ทาตพฺพํ ฯ สเจ อสุกภิกฺขุ คณฺหาตูติ วทติ วฏฺฏติ ฯ อถ มยฺหํ ธุวกาเร เทถาติ วตฺวา อวิจาเรตฺวาว คจฺฉติ สงฺฆสฺสาปิ วิจาเรตุํ วฏฺฏติ ฯ เอวํ ปน วิจาเรตพฺพํ สงฺฆตฺเถรสฺส วสนฏฺฐาเน เทถาติ วตฺตพฺพํ ฯ สเจ ตตฺถ เสนาสนํ ปริปุณฺณํ โหติ ยตฺถ นปฺปโหติ ตตฺถ ทาตพฺพํ ฯ สเจ เอโก ภิกฺขุ มยฺหํ วสนฏฺฐาเน เสนาสนปริโภคภณฺฑํ นตฺถีติ วทติ ตตฺถ ทาตพฺพํ ฯ สงฺฆสฺส เทตีติ วิหารํ ปวิสิตฺวา อิมานิ จีวรานิ สงฺฆสฺส ทมฺมีติ วทติ ฯ สมฺมุขีภูเตนาติ อุปจารสีมาย ฐิเตน สงฺเฆน คณฺฑึ ปหริตฺวา กาลํ โฆสาเปตฺวา ภาเชตพฺพํ ฯ สีมฏฺฐสฺส อสมฺปตฺตสฺสาปิ ภาคํ คณฺหนฺโต น วาเรตพฺโพ ฯ วิหาโร มหา โหติ เถราสนโต ปฏฺฐาย วตฺเถสุ ทียมาเนสุ อลสชาติกา มหาเถรา ปจฺฉา อาคจฺฉนฺติ ภนฺเต วีสติวสฺสานํ ทียติ ตุมฺหากํ ฐิติกา อติกฺกนฺตาติ น วตฺตพฺพา ฐิติกํ ฐเปตฺวา เตสํ ทตฺวา ปจฺฉา ฐิติกาย ทาตพฺพํ ฯ