Gahapatīti manussā āvāsaṃ katvā kappiyakuṭiṃ dema paribhuñjathāti vadanti esā gahapati nāma. Kappiyakuṭiṃ kātuṃ demāti vuttepi vaṭṭatiyeva. Andhakaṭṭhakathāyampana yasmā bhikkhuṃ ṭhapetvā sesasahadhammikānaṃ sabbesañca devamanussānaṃ hatthato paṭiggaho ca sannidhi ca antovutthañca tesaṃ santakaṃ bhikkhussa vaṭṭati tasmā tesaṃ gehāni tehi dinnā kappiyakuṭī vā gahapatīti vuccatīti vuttaṃ. Punapi vuttaṃ bhikkhusaṅghassa vihāraṃ ṭhapetvā bhikkhunīnaṃ upassayo ārāmikānaṃ vā titthiyānaṃ vā devatānaṃ vā nāgānaṃ vā api brahmānaṃ vā vimānaṃ kappiyakuṭī hotīti taṃ suvuttaṃ saṅghasantakameva hi bhikkhusantakaṃ vā gehaṃ gahapatikuṭī na hoti. Sammatikā nāma kammavācāya sāvetvā katāti. Yaṃ imāsu catūsu kappiyabhūmīsu vutthaṃ āmisaṃ taṃ sabbaṃ antovutthasaṅkhaṃ na gacchati bhikkhūnañca bhikkhunīnañca antovutthaantopakkamocanatthaṃ hi kappiyakuṭiyo anuññātā. Yampana akappiyabhūmiyaṃ sahaseyyāpahonake gehe vutthaṃ saṅghikaṃ vā puggalikaṃ vā bhikkhussa bhikkhuniyā vā santakaṃ ekarattampi Ṭhapitaṃ taṃ antovutthaṃ tattha pakkañca antopakkaṃ nāma hoti etaṃ na kappati. Sattāhakālikampana yāvajīvikañca vaṭṭati.

Tatrāyaṃ vinicchayo sāmaṇero bhikkhussa taṇḍulādikaṃ āmisaṃ āharitvā kappiyakuṭiyaṃ nikkhipitvā punadivase pacitvā deti antovutthaṃ na hoti. Tattha akappiyakuṭiyaṃ nikkhittasappiādīsu yaṅkiñci pakkhipitvā deti mukhasannidhi nāma hoti. Mahāpaccariyaṃ pana antovutthaṃ hotīti vuttaṃ. Tattha nāmamattameva nānākaraṇaṃ. Bhikkhu akappiyakuṭiyaṃ ṭhapitasappiñca yāvajīvikapaṇṇañca ekato pacitvā paribhuñjati sattāhaṃ nirāmisaṃ vaṭṭati. Sace āmisasaṃsaṭṭhaṃ katvā paribhuñjati antovutthañceva sāmapakkañca hoti. Etenupāyena sabbasaṃsaggā veditabbā. Imā pana kappiyakuṭiyo kadā jahitavatthukā hontīti. Ussāvanantikā tāva yā thambhānaṃ upari bhittipāde vā nikkhanitvā katā sā sabbesu thambhesu ca bhittipādesu ca apanītesu jahitavatthukā hoti. Sace pana thambhe vā bhittipāde vā parivattanti yo yo ṭhito tattha tattha patiṭṭhāti sabbesupi parivattitesu jahitavatthukāva hoti. Iṭṭhakādīhi katā cayassa uparibhittiatthāya ṭhapitaṃ iṭṭhakaṃ vā silaṃ vā mattikāpiṇḍaṃ vā ādiṃ katvā vināsitakāle jahitavatthukā hoti. Yehi pana iṭṭhakādīhi adhiṭṭhitā tesu apanītesupi tadaññesu patiṭṭhitesu ajahitavatthukāva hoti. Gonisādikā pākārādīhi parikkhepe kate jahitavatthukā hoti. Puna tasmiṃ ārāme kappiyakuṭiṃ laddhuṃ vaṭṭati. Sace pana punapi pākārādayo tattha tattha khaṇḍā honti tato tato gāvo pavisanti puna kappiyakuṭī hoti. Itarā pana dve gopānasimattaṃ ṭhapetvā sabbasmiṃ chadane vinaṭṭhe jahitavatthukā honti. Sace gopānasīnaṃ upari ekampi pakkhapāsakamaṇḍalaṃ atthi rakkhati. Yatra panimā catassopi kappiyabhūmiyo natthi tattha kiṃ kātabbanti. Anupasampannassa datvā tassa santakaṃ katvā paribhuñjitabbaṃ. Tatridaṃ vatthu karavikatissatthero kira vinayadharapāmokkho mahāsīvattherassa santikaṃ agamāsi. So dīpālokena sappikumbhaṃ passitvā bhante kimetanti pucchi. Thero āvuso gāmato sappikumbho ābhato lūkhadivase sappinā bhuñjanatthāyāti āha. Tato naṃ tissatthero na vaṭṭati bhanteti āha. Thero punadivase pamukhe nikkhipāpesi. Tissatthero puna ekadivasaṃ āgato taṃ disvā tatheva pucchitvā bhante sahaseyyāpahonakaṭṭhāne ṭhapetuṃ na vaṭṭatīti āha. Thero punadivase bahi nīharāpetvā nikkhipāpesi. Taṃ corā hariṃsu. So puna ekadivasaṃ āgataṃ tissattheramāha āvuso tayā na vaṭṭatīti vutte so kumbho bahi nikkhitto corehi avahaṭoti. Tato naṃ tissatthero āha nanu bhante anupasampannassa dātabbo assa anupasampannassa hi datvā tassa santakaṃ katvā paribhuñjituṃ vaṭṭatīti.