Tadahupaṭiggahitaṃ kāle kappatītiādi sabbaṃ sambhinnarasaṃ sandhāya vuttaṃ. Sace hi challimpi anapanetvā sakaleneva nāḷikeraphalena saddhiṃ pānakaṃ paṭiggahitaṃ hoti nāḷikeraṃ apanetvā taṃ vikālepi vaṭṭati. Upari sappipiṇḍaṃ ṭhapetvā sītalapāyāsaṃ denti yaṃ pāyāsena asaṃsaṭṭhaṃ sappi taṃ apanetvā sattāhaṃ paribhuñjituṃ vaṭṭati. Thaddhamadhuphāṇitādīsupi eseva nayo. Takkolajātiphalādīhipi alaṅkaritvā piṇḍapātaṃ denti tāni uddharitvā dhovitvā yāvajīvaṃ paribhuñjitabbāni. Yāguyaṃ pakkhipitvā dinnasiṅgi- verādīsu telādīsupi pakkhipitvā dinnalaṭṭhimadhukādīsupi eseva nayo. Evaṃ yaṃ yaṃ asambhinnarasaṃ hoti taṃ taṃ ekato paṭiggahitampi yathā suddhaṃ hoti tathā dhovitvā vā tacchetvā vā tassa tassa kālavasena paribhuñjituṃ vaṭṭati. Sace pana sambhinnarasaṃ hoti saṃsaṭṭhaṃ na vaṭṭati. Yāvakālikaṃ hi attanā saddhiṃ sambhinnarasāni tīṇipi yāmakālikādīni attano sabhāvaṃ upaneti yāmakālikampi dvepi sattāhakālikādīni attano sabhāvaṃ upaneti sattāhakālikampi attanā saddhiṃ saṃsaṭṭhaṃ yāvajīvikaṃ attano sabhāvaṃyeva upaneti tasmā tena tadahupaṭiggahitena saddhiṃ tadahupaṭiggahitaṃ vā pure Paṭiggahitaṃ vā yāvajīvikaṃ sattāhaṃ kappati dvīhapaṭiggahitena chāhaṃ tīhapaṭiggahitena pañcāhaṃ sattāhapaṭiggahitena tadaheva kappatīti veditabbaṃ. Tasmāyeva hi sattāhakālikena bhikkhave yāvajīvikaṃ tadahupaṭiggahitanti avatvā paṭiggahitaṃ sattāhaṃ kappatīti vuttaṃ.

Kālayāmasattāhātikkamesu cettha vikālabhojanasannidhibhesajjasikkhāpadānaṃ vasena āpattiyo veditabbā. Imesu ca pana catūsu kālikesu yāvakālikaṃ yāmakālikanti idameva dvayaṃ antovutthakañceva sannidhikārakañca hoti sattāhakālakañca yāvajīvikañca akappiyakuṭiyaṃ nikkhipitumpi vaṭṭati sannidhimpi na janetīti. Sesaṃ sabbattha uttānamevāti.

Bhesajjakkhandhakavaṇṇanā niṭṭhitā.