{353} Puthujjanā kāmesu vītarāgāti jhānalābhino. {356} Sandiṭṭhoti Diṭṭhamattakamitto. Sambhattoti ekasambhogo daḷhamitto. Ālapitoti mama santakaṃ yaṃ iccheyyāsi taṃ gaṇheyyāsīti evaṃ vutto. Etesu tīsu aññatarena saddhiṃ jīvati gahite attamano hotīti imehi tīhi vissāso rūhati. {359} Paṃsukūlikatoti katapaṃsukūlo. Garuko hotīti jiṇṇajiṇṇaṭṭhāne aggaḷāropanena garuko hoti. Suttalūkhaṃ kātunti sutteneva aggaḷaṃ kātunti attho. Vikaṇṇoti suttaṃ acchetvā sibbitānaṃ eko saṅghāṭikaṇṇo dīgho hoti. Vikaṇṇaṃ uddharitunti dīghakoṇaṃ chindituṃ. Okiriyantīti chinnakoṇato galati. Anuvātaṃ paribhaṇḍanti anuvātañceva paribhaṇḍañca. Pattā lujjantīti mahantesu pattamukhesu dinnāni suttāni galanti tato pattā lujjanti. Aṭṭhapadakaṃ kātunti aṭṭhapadakacchandena pattamukhaṃ sibbituṃ. {360} Anvādhikaṃpi āropetunti āgantukapaṭaṃ dātuṃ. Idaṃ pana appahonake āropetabbaṃ sace pahoti āgantukapaṭaṃ