na vaṭṭati chinditabbameva. {361} Na bhikkhave saddhādeyyanti ettha sesañātīnaṃ dento vinipātetiyeva mātāpitaro pana sace rajje ṭhitāpi patthenti dātabbaṃ. {362} Gilānoti gilānatāya gahetvā gantuṃ asamattho. Vassikasaṅketanti vassike cattāro māse. Nadīpāranti nadiyā pāre bhattaṃ bhuñjitabbaṃ hoti. Aggaḷaguttivihāroti sabbesveva cetesu gilānavassikasaṅketanadīpāragamanaatthatakaṭhinabhāvesu aggaḷaguttiyeva pamāṇaṃ gutte eva hi vihāre nikkhipitvā bahi gantuṃ vaṭṭati na agutte araññakassa pana vihāro na sugutto Hoti tena bhaṇḍukkhaliyaṃ pakkhipitvā pāsāṇasusirarukkhasusirādīsu supaṭicchannesu ṭhapetvā gantabbaṃ.