{379} Idāni ādito paṭṭhāya vuttacīvarānaṃ paṭilābhakhettaṃ dassetuṃ aṭṭhimā bhikkhave mātikātiādimāha. Sīmāya detītiādi puggalādhiṭṭhānanayena vuttaṃ. Ettha ca sīmāya dānaṃ paṭhamamātikā katikāya dānaṃ dutiyā .pe. Puggalassa dānaṃ aṭṭhamā. Tattha sīmāya dammīti evaṃ sīmaṃ parāmasitvā dento sīmāya deti nāma. Eseva nayo sabbattha. Sīmāya deti yāvatikā bhikkhū antosīmagatā tehi bhājetabbantiādimhi pana mātikāniddese sīmāya detīti ettha tāva khaṇḍasīmā upacārasīmā samānasaṃvāsasīmā avippavāsasīmā lābhasīmā gāmasīmā nigamasīmā nagarasīmā abbhantarasīmā udakukkhepasīmā janapadasīmā raṭṭhasīmā rajjasīmā dīpasīmā cakkavāḷasīmā iti paṇṇarasa sīmā veditabbā. Tattha khaṇḍasīmā sīmākathāya vuttāva. Upacārasīmā parikkhittassa vihārassa parikkhepena aparikkhittassa parikkhepārahaṭṭhānena paricchinnā hoti. Apica bhikkhūnaṃ dhuvasannipātaṭṭhānato vā pariyante ṭhitabhojanasālato vā nivaddhavasanakaāvāsato vā thāmamajjhimassa purisassa dvinnaṃ leḍḍupātānaṃ anto upacārasīmā veditabbā. Sā pana āvāsesu vaḍḍhantesu vaḍḍhati parihāyantesu parihāyati. Mahāpaccariyaṃ pana sā lābhavasena bhikkhūsu vaḍḍhantesu vaḍḍhatīti vuttaṃ. Sace vihāre sannipatitabhikkhūhi saddhiṃ ekabaddhā hutvā yojanasataṃpi pūretvā nisīdanti yojanasatampi upacārasīmāva hoti sabbesaṃ Lābho pāpuṇāti. Samānasaṃvāsaavippavāsasīmādvayaṃpi vuttanayameva.

Lābhasīmā nāma neva sammāsambuddhena anuññātā na dhammasaṅgāhakattherehi ṭhapitā apica kho rājarājamahāmattā vihāraṃ kārāpetvā gāvutaṃ vā aḍḍhayojanaṃ vā yojanaṃ vā samantato paricchinditvā ayaṃ amhākaṃ vihārassa lābhasīmāti nāmalikhitatthambhe nikhanitvā yaṃ etthantare uppajjati sabbaṃ taṃ amhākaṃ vihārassa demāti sīmaṃ ṭhapenti ayaṃ lābhasīmā nāma. Gāmanigama- nagaraabbhantaraudakukkhepasīmāpi vuttāyeva. Janapadasīmā nāma kāsikosalaraṭṭhādīnaṃ anto bahū janapadā honti tattha ekeko janapadaparicchedo janapadasīmā nāma. Raṭṭhasīmā nāma kāsikosalādi- raṭṭhaparicchedo. Rajjasīmā nāma balibhogo colabhogo keraṭṭhabhogoti evamekekassa rañño āṇāpavattiṭṭhānaṃ. Dīpasīmā nāma samuddantena paricchinnā mahādīpā ca antaradīpā ca. Cakkavāḷasīmā nāma cakkavāḷapabbateneva paricchinnā. Evametāsu sīmāsu khaṇḍasīmāya kenaci kammena sannipatitaṃ saṅghaṃ disvā ettheva sīmāya saṅghassa demāti vutte yāvatikā bhikkhū antokhaṇḍasīmagatā tehi bhājetabbaṃ. Tesaṃyeva hi taṃ pāpuṇāti. Aññesaṃ sīmantarikāya vā upacārasīmāya vā ṭhitānampi na pāpuṇāti. Khaṇḍasīmāya uṭṭhite pana rukkhe vā pabbate vā ṭhitassa heṭṭhā vā paṭhavīvemajjhagatassa pāpuṇātiyeva. Imissā upacārasīmāya saṅghassa dammīti dinnampana khaṇḍasīmasīmantarikāsu ṭhitānaṃpi pāpuṇāti. Samānasaṃvāsasīmāya dammīti dinnaṃ pana khaṇḍasīmasīmantarikāsu ṭhitānaṃ na pāpuṇāti. Avippavāsasīmālābhasīmāsu dinnaṃ tāsu sīmāsu antogatānaṃ pāpuṇāti. Gāmasīmādīsu dinnampana tāsaṃ sīmānaṃ abbhantare baddhasīmāya ṭhitānampi pāpuṇāti. Abbhantarasīma- udakukkhepasīmāsu dinnaṃ tattha antogatānaṃyeva pāpuṇāti. Janapadaraṭṭharajjadīpacakkavāḷasīmāsu gāmasīmādīsu vuttasadisoyeva vinicchayo.