TIPITAKA Volume 5 : PALI ROMAN Vinaya Pitaka Vol 5 : Vinaya. Mahā (2)

[172] Aṭṭhimā bhikkhave mātikā cīvarassa uppādāya sīmāya Deti katikāya deti bhikkhāpaññattiyā deti saṅghassa deti ubhatosaṅghassa deti vassaṃ vutthassa saṅghassa deti ādissa deti puggalassa deti . sīmāya deti yāvatikā bhikkhū antosīmagatā tehi bhājetabbaṃ . katikāya deti sambahulā āvāsā samānalābhā honti ekasmiṃ āvāse dinne sabbattha dinnaṃ hoti . bhikkhāpaññattiyā deti yattha saṅghassa dhuvakārā kariyanti tattha deti 1- . saṅghassa deti sammukhībhūtena saṅghena bhājetabbaṃ. Ubhatosaṅghassa deti bahukāpi bhikkhū honti ekā bhikkhunī hoti upaḍḍhaṃ dātabbaṃ . bahukāpi bhikkhuniyo honti eko bhikkhu hoti upaḍḍhaṃ dātabbaṃ . vassaṃ vutthassa saṅghassa deti yāvatikā bhikkhū tasmiṃ āvāse vassaṃ vutthā tehi bhājetabbaṃ . ādissa deti yāguyā vā bhatte vā khādanīye vā cīvare vā senāsane vā bhesajje vā. Puggalassa deti imaṃ cīvaraṃ itthannāmassa dammīti. Cīvarakkhandhakaṃ niṭṭhitaṃ aṭṭhamaṃ 2- . Imamhi khandhake vatthū channavuti. -----------