TIPITAKA Volume 5 : PALI ROMAN Vinaya Pitaka Vol 5 : Vinaya. Mahā (2) Campeyyakkhandhakaṃ

[174] Tena samayena buddho bhagavā campāyaṃ viharati gaggarāya pokkharaṇiyā tīre . tena kho pana samayena kāsīsu janapadesu vāsabhagāmo nāma hoti . tattha kassapagotto nāma bhikkhu āvāsiko hoti tantibaddho ussukkaṃ āpanno kinti anāgatā ca pesalā bhikkhū āgaccheyyuṃ āgatā ca pesalā bhikkhū phāsuṃ 1- vihareyyuṃ ayañca āvāso vuḍḍhiṃ viruḷhiṃ vepullaṃ āpajjeyyāti . Tena kho pana samayena sambahulā bhikkhū kāsīsu cārikaṃ caramānā yena vāsabhagāmo tadavasariṃsu 2- . addasā kho kassapagotto bhikkhu te bhikkhū dūrato va āgacchante disvāna āsanaṃ paññāpesi pādodakaṃ pādapīṭhaṃ pādakathalikaṃ upanikkhipi paccuggantvā pattacīvaraṃ paṭiggahesi pānīyena āpucchi nahāne ussukkaṃ akāsi ussukkaṃpi akāsi yāguyā khādanīye bhattasmiṃ. {174.1} Athakho tesaṃ āgantukānaṃ bhikkhūnaṃ etadahosi bhaddako kho ayaṃ āvuso āvāsiko bhikkhu nahāne ussukkaṃ karoti ussukkaṃpi karoti yāguyā khādanīye bhattasmiṃ handa mayaṃ āvuso idheva vāsabhagāme nivāsaṃ kappemāti . athakho te āgantukā bhikkhū tattheva vāsabhagāme nivāsaṃ kappesuṃ. {174.2} Athakho kassapagottassa bhikkhuno etadahosi yo kho @Footnote: 1 Po. Ma. Yu. phāsu. 2 Ma. Yu. tadavasaruṃ. Imesaṃ āgantukānaṃ bhikkhūnaṃ āgantukakilamatho so paṭippassaddho yepīme gocare appakataññuno tedānīme gocare pakataññuno dukkaraṃ kho pana parakulesu yāvajīvaṃ ussukkaṃ kātuṃ viññatti ca manussānaṃ amanāpā yannūnāhaṃ na ussukkaṃ kareyyaṃ yāguyā khādanīye bhattasminti . so na ussukkaṃ akāsi yāguyā khādanīye bhattasmiṃ . athakho tesaṃ āgantukānaṃ bhikkhūnaṃ etadahosi pubbe khvāyaṃ āvuso āvāsiko bhikkhu nahāne ussukkaṃ karoti 1- ussukkaṃpi karoti 2- yāguyā khādanīye bhattasmiṃ sodānāyaṃ na ussukkaṃ karoti yāguyā khādanīye bhattasmiṃ duṭṭhodānāyaṃ āvuso āvāsiko bhikkhu handa mayaṃ āvuso imaṃ 3- āvāsikaṃ bhikkhuṃ ukkhipāmāti. {174.3} Athakho te āgantukā bhikkhū sannipatitvā kassapagottaṃ bhikkhuṃ etadavocuṃ pubbe kho tvaṃ āvuso nahāne ussukkaṃ karosi ussukkaṃpi karosi yāguyā khādanīye bhattasmiṃ sodāni tvaṃ na ussukkaṃ karosi yāguyā khādanīye bhattasmiṃ āpattiṃ tvaṃ āvuso āpanno passasetaṃ āpattinti . natthi me āvuso āpatti yamahaṃ passeyyanti . athakho te āgantukā bhikkhū kassapagottaṃ bhikkhuṃ āpattiyā adassane ukkhipiṃsu. {174.4} Athakho kassapagottassa bhikkhuno etadahosi ahaṃ kho etaṃ na jānāmi āpatti vā esā anāpatti vā āpanno camhi anāpanno vā ukkhitto @Footnote: 1-2 Ma. Yu. akāsi. 3 Sī. Ma. Yu. ayaṃ pāṭho na hoti. Camhi anukkhitto vā dhammikena vā adhammikena vā kuppena vā akuppena vā ṭhānārahena vā aṭṭhānārahena vā yannūnāhaṃ campaṃ gantvā bhagavantaṃ etamatthaṃ puccheyyanti . athakho kassapagotto bhikkhu senāsanaṃ saṃsāmetvā pattacīvaramādāya yena campā tena pakkāmi anupubbena yena campā yena bhagavā tenupasaṅkami upasaṅkamitvā bhagavantaṃ abhivādetvā ekamantaṃ nisīdi . āciṇṇaṃ kho panetaṃ buddhānaṃ bhagavantānaṃ āgantukehi bhikkhūhi saddhiṃ paṭisammodituṃ. {174.5} Athakho bhagavā kassapagottaṃ bhikkhuṃ etadavoca kacci bhikkhu khamanīyaṃ kacci yāpanīyaṃ kaccisi 1- appakilamathena addhānaṃ āgato kuto ca tvaṃ bhikkhu āgacchasīti . khamanīyaṃ bhagavā yāpanīyaṃ bhagavā appakilamathena cāhaṃ bhante addhānaṃ āgato atthi bhante kāsīsu janapadesu vāsabhagāmo nāma tatthāhaṃ