TIPITAKA Volume 5 : PALI ROMAN Vinaya Pitaka Vol 5 : Vinaya. Mahā (2)

[193] Ekaccassa bhikkhave saṅghamajjhe paṭikkosanā rūhati ekaccassa na rūhati . kassa ca bhikkhave saṅghamajjhe paṭikkosanā na rūhati . bhikkhuniyā bhikkhave saṅghamajjhe paṭikkosanā na rūhati . Sikkhamānāya bhikkhave .pe. sāmaṇerassa bhikkhave sāmaṇeriyā bhikkhave sikkhaṃ paccakkhātakassa bhikkhave antimavatthuṃ ajjhāpannakassa bhikkhave ummattakassa bhikkhave khittacittassa bhikkhave vedanaṭṭassa bhikkhave āpattiyā adassane ukkhittakassa bhikkhave āpattiyā appaṭikamme ukkhittakassa bhikkhave pāpikāya diṭṭhiyā Appaṭinissagge ukkhittakassa bhikkhave paṇḍakassa bhikkhave theyyasaṃvāsakassa bhikkhave titthiyapakkantakassa bhikkhave tiracchānagatassa bhikkhave mātughātakassa bhikkhave pitughātakassa bhikkhave arahantaghātakassa bhikkhave bhikkhunīdūsakassa bhikkhave saṅghabhedakassa bhikkhave lohituppādakassa bhikkhave ubhatobyañjanakassa bhikkhave nānāsaṃvāsakassa bhikkhave nānāsīmāya ṭhitassa bhikkhave iddhiyā vehāse ṭhitassa bhikkhave yassa saṅgho kammaṃ karoti tassa

[1]- Bhikkhave saṅghamajjhe paṭikkosanā na rūhati . imesaṃ kho bhikkhave saṅghamajjhe paṭikkosanā na rūhati . kassa ca bhikkhave saṅghamajjhe paṭikkosanā rūhati . bhikkhussa bhikkhave pakatattassa samānasaṃvāsakassa samānasīmāya ṭhitassa antamaso anantarikassāpi bhikkhuno viññāpentassa saṅghamajjhe paṭikkosanā rūhati . Imassa kho bhikkhave saṅghamajjhe paṭikkosanā rūhati.

[194] Dvemā bhikkhave nissāraṇā atthi bhikkhave puggalo appatto nissāraṇaṃ taṃ ce saṅgho nissāreti ekacco sunissārito ekacco dunnissārito . katamo ca bhikkhave puggalo appatto nissāraṇaṃ taṃ ce saṅgho nissāreti dunnissārito . idha