[208] Idha pana bhikkhave bhikkhu bhaṇḍanakārako hoti kalahakārako vivādakārako bhassakārako saṅghe adhikaraṇakārako . tatra ce Bhikkhūnaṃ evaṃ hoti ayaṃ kho āvuso bhikkhu bhaṇḍanakārako kalahakārako vivādakārako bhassakārako saṅghe adhikaraṇakārako handassa mayaṃ tajjanīyakammaṃ karomāti . te tassa tajjanīyakammaṃ karonti dhammapaṭirūpakena samaggā . so tamhā āvāsā aññaṃpi āvāsaṃ gacchati . tatthapi bhikkhūnaṃ evaṃ hoti ayaṃ kho āvuso bhikkhu saṅghena tajjanīyakammakato dhammapaṭirūpakena samaggehi handassa mayaṃ tajjanīyakammaṃ karomāti . te tassa tajjanīyakammaṃ karonti adhammena vaggā. So tamhā āvāsā aññaṃpi āvāsaṃ gacchati. {208.1} Tatthapi bhikkhūnaṃ evaṃ hoti ayaṃ kho āvuso bhikkhu saṅghena tajjanīyakammakato adhammena vaggehi handassa mayaṃ tajjanīyakammaṃ karomāti . te tassa tajjanīyakammaṃ karonti adhammena samaggā . So tamhā āvāsā aññaṃpi āvāsaṃ gacchati . tatthapi bhikkhūnaṃ evaṃ hoti ayaṃ kho āvuso bhikkhu saṅghena tajjanīyakammakato adhammena samaggehi handassa mayaṃ tajjanīyakammaṃ karomāti . te tassa tajjanīyakammaṃ karonti dhammena vaggā . so tamhā āvāsā aññaṃpi āvāsaṃ gacchati . tatthapi bhikkhūnaṃ evaṃ hoti ayaṃ kho āvuso bhikkhu saṅghena tajjanīyakammakato dhammena vaggehi handassa mayaṃ tajjanīyakammaṃ karomāti . te tassa tajjanīyakammaṃ karonti dhammapaṭirūpakena vaggā.

[209] Idha pana bhikkhave bhikkhu bālo hoti abyatto āpattibahulo Anapadāno gihisaṃsaṭṭho viharati ananulomikehi gihisaṃsaggehi . Tatra ce bhikkhūnaṃ evaṃ hoti ayaṃ kho āvuso bhikkhu bālo abyatto āpattibahulo anapadāno gihisaṃsaṭṭho viharati ananulomikehi gihisaṃsaggehi handassa mayaṃ niyassakammaṃ karomāti . te tassa niyassakammaṃ karonti adhammena vaggā . so tamhā āvāsā aññaṃpi āvāsaṃ gacchati . tatthapi bhikkhūnaṃ evaṃ hoti ayaṃ kho āvuso bhikkhu saṅghena niyassakammakato adhammena vaggehi handassa mayaṃ niyassakammaṃ karomāti . te tassa niyassakammaṃ karonti adhammena samaggā .pe. dhammena vaggā . dhammapaṭirūpakena vaggā . dhammapaṭirūpakena samaggā . yathā heṭṭhā tathā cakkaṃ kātabbaṃ.