Samathakkhandhakavaṇṇanā

-------

{186-187} samathakkhandhake. Adhammavādī puggalotiādīni cha mātikāpadāni nikkhipitvā adhammavādī puggalo dhammavādiṃ puggalaṃ saññāpetītiādinā nayena vitthāro vutto. Tattha saññāpetīti kāraṇapaṭirūpakāni vacanāni vatvā paritosetvā jānāpeti. Nijjhāpetīti yathā so taṃ atthaṃ nijjhāpeti oloketi evaṃ karoti. Pekkheti anupekkhetīti yathā so taṃ atthaṃ pekkheti ceva punappunaṃ ca pekkheti evaṃ karoti. Dasseti anudassetīti tesaññeva pariyāyavacanāni. Adhammena vūpasamatīti yasmā so adhammameva ayaṃ dhammotiādinā nayena taṃ mohetvā dasseti tasmā adhammena vūpasamati nāma. {188} Dhammena vūpasamatīti yasmā dhammavādī dhammameva ayaṃ dhammotiādinā nayena amohetvā dasseti tasmā dhammena vūpasamati nāma.

{195} Pañcimāni bhikkhave dhammikāni sativinayassa dānānīti ettha suddhassa āpattikassa dānaṃ ekaṃ anuvaditassa dānaṃ ekaṃ yācitassa dānaṃ ekaṃ saṅghena dānaṃ ekaṃ dhammena samaggena dānaṃ ekanti evaṃ pañca. Etāni pana ekekaaṅgavasena na labbhanti. Tasmā desanāmattamevetaṃ. Pañcaṅgasamannāgataṃ pana Sativinayadānaṃ dhammikanti ayamettha attho. Tattha ca anuvadantīti codenti. Sesaṃ uttānameva. Ayampana sativinayo khīṇāsavasseva dātabbo na aññassa antamaso anāgāminopi. So ca kho aññena codiyamānasseva na acodiyamānassa. Dinne ca pana tasmiṃ codakassa kathā na rūhati. Codentopi ayaṃ khīṇāsavo sativinayaladdho ko tuyhaṃ kathaṃ gahessatīti apasādetabbataṃ āpajjati.