Agghasamodhāno nāma sambahulāsu āpattīsu yā ekā vā dve vā tisso vā sambahulā vā āpattiyo sabbacirapaṭicchannāyo tāsaṃ agghena samodhāya tāsaṃ rattiparicchedavasena avasesānaṃ ūnakatarapaṭicchannānaṃ āpattīnaṃ parivāso diyyati. Ayaṃ vuccati agghasamodhāno nāma. So parato tena kho pana samayena aññataro bhikkhu sambahulā saṅghādisesā āpattiyo āpanno hoti Ekā āpatti ekāhapaṭicchannā ekā āpatti dvīhapaṭicchannāti- ādinā nayena pāliyaṃ āgatoyeva. Yassa pana sataṃ āpattiyo dasāhapaṭicchannā aparāpi sataṃ āpattiyo dasāhapaṭicchannāti evaṃ dasakkhattuṃ katvā āpattisahassaṃ divasasataṃ paṭicchannaṃ hoti tena kiṃ kātabbanti. Sabbā samodahitvā dasadivase parivasitabbaṃ. Evaṃ ekeneva dasāhena divasasataṃpi parivasitabbameva hoti. Vuttampi cetaṃ
dasasataṃ rattisataṃ āpattiyo chādayitvāna dasarattiyo vasitvāna muñceyya pārivāsiko pañhā mesā kusalehi cintitāti
ayaṃ agghasamodhāno nāma.
Missakasamodhāno nāma yo nānāvatthukāyo āpattiyo ekato katvā diyyati. Tatrāyaṃ nayo ahaṃ bhante sambahulā saṅghādisesā āpattiyo āpajjiṃ ekaṃ sukkavisaṭṭhiṃ ekaṃ kāyasaṃsaggaṃ ekaṃ duṭṭhullavācaṃ ekaṃ attakāmaṃ ekaṃ sañcarittaṃ ekaṃ kuṭikāraṃ ekaṃ vihārakāraṃ ekaṃ duṭṭhadosaṃ ekaṃ aññabhāgiyaṃ ekaṃ saṅghabhedakaṃ ekaṃ bhedānuvattakaṃ ekaṃ dubbacaṃ ekaṃ kuladūsakaṃ sohaṃ bhante saṅghaṃ tāsaṃ āpattīnaṃ samodhānaparivāsaṃ yācāmīti tikkhattuṃ yācāpetvā tadanurūpāya kammavācāya parivāso dātabbo. Ettha ca saṅghādisesā āpattiyo āpajjiṃ nānāvatthukāyotipi saṅghādisesā āpattiyo āpajjiṃ itipi evaṃ pubbe vuttanayeneva vatthuvasenapi gottavasenapi nāmavasenapi āpattivasenapi yojetvā kammaṃ kātuṃ vaṭṭatiyeva. Ayaṃ missakasamodhāno nāma. Sabbaparivāsakammavācāvasāne pana Nikkhittānikkhittavattādikathā purimanayeneva veditabbā.