TIPITAKA Volume 6 : PALI ROMAN Vinaya Pitaka Vol 6 : Vinaya. Culla (1)

[440] Tena kho pana samayena aññataro bhikkhu sambahulā saṅghādisesā āpattiyo āpanno hoti ekā āpatti ekāhapaṭicchannā ekā āpatti dvīhapaṭicchannā ekā āpatti tīhapaṭicchannā ekā āpatti catūhapaṭicchannā ekā āpatti pañcāhapaṭicchannā ekā āpatti chāhapaṭicchannā ekā āpatti sattāhapaṭicchannā ekā āpatti aṭṭhāhapaṭicchannā ekā āpatti navāhapaṭicchannā ekā āpatti dasāhapaṭicchannā . So bhikkhūnaṃ ārocesi ahaṃ āvuso sambahulā saṅghādisesā āpattiyo āpajjiṃ ekā āpatti ekāhapaṭicchannā .pe. Ekā āpatti dasāhapaṭicchannā kathaṃ nu kho mayā paṭipajjitabbanti . Te bhikkhū bhagavato etamatthaṃ ārocesuṃ . tenahi bhikkhave saṅgho tassa bhikkhuno tāsaṃ āpattīnaṃ yā āpatti Dasāhapaṭicchannā tassā agghena samodhānaparivāsaṃ detu.

[441] Evañca pana bhikkhave dātabbo . Tena bhikkhave bhikkhunā saṅghaṃ upasaṅkamitvā ekaṃsaṃ uttarāsaṅgaṃ karitvā vuḍḍhānaṃ bhikkhūnaṃ pāde vanditvā ukkuṭikaṃ nisīditvā añjaliṃ paggahetvā evamassa vacanīyo ahaṃ bhante sambahulā saṅghādisesā āpattiyo āpajjiṃ ekā āpatti ekāhapaṭicchannā .pe. ekā āpatti dasāhapaṭicchannā sohaṃ bhante saṅghaṃ tāsaṃ āpattīnaṃ yā āpatti dasāhapaṭicchannā tassā agghena samodhānaparivāsaṃ yācāmīti . Dutiyampi yācitabbo tatiyampi yācitabbo.

[442] Byattena bhikkhunā paṭibalena saṅgho ñāpetabbo {442.1} suṇātu me bhante saṅgho ayaṃ itthannāmo bhikkhu sambahulā saṅghādisesā āpattiyo āpajji ekā āpatti ekāhapaṭicchannā .pe. ekā āpatti dasāhapaṭicchannā so saṅghaṃ tāsaṃ āpattīnaṃ yā āpatti dasāhapaṭicchannā tassā agghena samodhānaparivāsaṃ yācati . yadi saṅghassa pattakallaṃ saṅgho itthannāmassa bhikkhuno tāsaṃ āpattīnaṃ yā āpatti dasāhapaṭicchannā tassā agghena samodhānaparivāsaṃ dadeyya. Esā ñatti. {442.2} Suṇātu me bhante saṅgho ayaṃ itthannāmo bhikkhu sambahulā saṅghādisesā āpattiyo āpajji ekā āpatti ekāhapaṭicchannā .pe. ekā āpatti dasāhapaṭicchannā so saṅghaṃ tāsaṃ āpattīnaṃ Yā āpatti dasāhapaṭicchannā tassā agghena samodhānaparivāsaṃ yācati . saṅgho itthannāmassa bhikkhuno tāsaṃ āpattīnaṃ yā āpatti dasāhapaṭicchannā tassā agghena samodhānaparivāsaṃ deti . Yassāyasmato khamati itthannāmassa bhikkhuno tāsaṃ āpattīnaṃ yā āpatti dasāhapaṭicchannā tassā agghena samodhānaparivāsassa dānaṃ so tuṇhassa yassa nakkhamati so bhāseyya. {442.3} Dutiyampi etamatthaṃ vadāmi .pe. tatiyampi etamatthaṃ vadāmi .pe. dinno saṅghena itthannāmassa bhikkhuno tāsaṃ āpattīnaṃ yā āpatti dasāhapaṭicchannā tassā agghena samodhānaparivāso khamati saṅghassa tasmā tuṇhī. Evametaṃ dhārayāmīti.