[443] Tena kho pana samayena aññataro bhikkhu sambahulā saṅghādisesā āpattiyo āpanno hoti ekā āpatti ekāhapaṭicchannā dve āpattiyo dvīhapaṭicchannāyo 1- tisso āpattiyo tīhapaṭicchannāyo catasso āpattiyo catūhapaṭicchannāyo pañca āpattiyo pañcāhapaṭicchannāyo 1- cha āpattiyo chāhapaṭicchannāyo 1- satta āpattiyo sattāhapaṭicchannāyo 1- aṭṭha āpattiyo aṭṭhāhapaṭicchannāyo nava āpattiyo navāhapaṭicchannāyo dasa āpattiyo dasāhapaṭicchannāyo . so bhikkhūnaṃ ārocesi ahaṃ āvuso sambahulā saṅghādisesā āpattiyo āpajjiṃ ekā āpatti ekāhapaṭicchannā .pe. dasa āpattiyo @Footnote: 1 Yu. ... channā. ito paraṃ sabbattha eseva nayo. Dasāhapaṭicchannāyo kathaṃ nu kho mayā paṭipajjitabbanti . te bhikkhū bhagavato etamatthaṃ ārocesuṃ . tenahi bhikkhave saṅgho tassa bhikkhuno tāsaṃ āpattīnaṃ yā āpattiyo sabbacirapaṭicchannāyo tāsaṃ agghena samodhānaparivāsaṃ detu.

[444] Evañca pana bhikkhave dātabbo . tena bhikkhave bhikkhunā saṅghaṃ upasaṅkamitvā ekaṃsaṃ uttarasaṅgaṃ karitvā .pe. Evamassa vacanīyo ahaṃ bhante sambahulā saṅghādisesā āpattiyo āpajjiṃ ekā āpatti ekāhapaṭicchannā .pe. dasa āpattiyo dasāhapaṭicchannāyo sohaṃ bhante saṅghaṃ tāsaṃ āpattīnaṃ yā āpattiyo sabbacirapaṭicchannāyo tāsaṃ agghena samodhānaparivāsaṃ yācāmīti. Dutiyampi yācitabbo tatiyampi yācitabbo.

[445] Byattena bhikkhunā paṭibalena saṅgho ñāpetabbo {445.1} suṇātu me bhante saṅgho ayaṃ itthannāmo bhikkhu sambahulā saṅghādisesā āpattiyo āpajji ekā āpatti ekāhapaṭicchannā .pe. dasa āpattiyo dasāhapaṭicchannāyo so saṅghaṃ tāsaṃ āpattīnaṃ yā āpattiyo sabbacirapaṭicchannāyo tāsaṃ agghena samodhānaparivāsaṃ yācati . yadi saṅghassa pattakallaṃ saṅgho itthannāmassa bhikkhuno tāsaṃ āpattīnaṃ yā āpattiyo sabbacirapaṭicchannāyo tāsaṃ agghena samodhānaparivāsaṃ dadeyya. Esā ñatti. {445.2} Suṇātu me bhante saṅgho ayaṃ itthannāmo bhikkhu sambahulā Saṅghādisesā āpattiyo āpajji ekā āpatti ekāhapaṭicchannā .pe. dasa āpattiyo dasāhapaṭicchannāyo so saṅghaṃ tāsaṃ āpattīnaṃ yā āpattiyo sabbacirapaṭicchannāyo tāsaṃ agghena samodhānaparivāsaṃ yācati . saṅgho itthannāmassa bhikkhuno tāsaṃ āpattīnaṃ yā āpattiyo sabbacirapaṭicchannāyo tāsaṃ agghena samodhānaparivāsaṃ deti . yassāyasmato khamati itthannāmassa bhikkhuno tāsaṃ āpattīnaṃ yā āpattiyo sabbacirapaṭicchannāyo tāsaṃ agghena samodhānaparivāsassa dānaṃ so tuṇhassa yassa nakkhamati so bhāseyya. {445.3} Dutiyampi etamatthaṃ vadāmi .pe. tatiyampi etamatthaṃ vadāmi .pe. dinno saṅghena itthannāmassa bhikkhuno tāsaṃ āpattīnaṃ yā āpattiyo sabbacirapaṭicchannāyo tāsaṃ agghena samodhānaparivāso khamati saṅghassa tasmā tuṇhī . evametaṃ dhārayāmīti.